काठमाडौं – प्रधान सेनापति खुला म्याराथनको ११औँ संस्करण आगामी माघ २४ गते आयोजना हुने भएको छ। नेपाली सैनिक शारीरिक तालिम तथा खेलकुद केन्द्रको आयोजनामा २६३औँ सेना दिवसको अवसर पारेर म्याराथन आयोजना गरिने जानकारी आज आयोजित पत्रकार सम्मेलनमार्फत दिइएको हो।
यस वर्ष म्याराथनको नारा ‘बलियो एकता, सुरक्षित राष्ट्र’ तय गरिएको छ। प्रतियोगितामा पुरुष म्याराथन (४२.१९५ किमी), महिला तथा पुरुष हाफ म्याराथन (२१ किमी) विधामा प्रतिस्पर्धा हुनेछ।
पुरुषतर्फ म्याराथन र हाफ म्याराथनका विजेताले मोटरसाइकल तथा महिलातर्फ हाफ म्याराथनकी विजेताले स्कुटर प्राप्त गर्नेछन्। हाफ म्याराथनका दुबै विजेताका लागि काठमाडौं महानगरपालिकाले पुरस्कार उपलब्ध गराउनेछ भने पुरुषतर्फको म्याराथन विजेतालाई रिसिक अटोमोबाइल प्रालिले मोटरसाइकल प्रदान गर्नेछ।
त्यसैगरी १० किमी दौड सैनिक अधिकृत, सैनिक सहचारी तथा सहचारी कार्यालयमा कार्यरत पदाधिकारी (महिला/पुरुष), सैनिक महाविद्यालयका तथा सेवारत/अवकाश प्राप्त सकलदर्जाका कक्षा १०–१२ मा अध्ययनरत छोराछोरी तथा गैरसैनिक कक्षा १०–१२ का विद्यार्थीका लागि खुला रहनेछ।
५ किमी वाकाथन प्रमुख अतिथि तथा आमन्त्रित उच्चपदस्थ व्यक्तित्वका लागि राखिएको छ भने ५ किमी दौड सैनिक महाविद्यालयमा अध्ययनरत कक्षा ७ देखि ९ सम्मका छात्र–छात्राका लागि हुनेछ।
प्रतियोगितामा कुल झन्डै १४ लाख रुपैयाँ बराबरको पुरस्कार वितरण गरिनेछ। म्याराथनका विजेताले मोटरसाइकलसहित ३ लाख, दोस्रोले २ लाख र तेस्रोले १ लाख रुपैयाँ प्राप्त गर्नेछन्। शीर्ष १० खेलाडीलाई नगद पुरस्कार दिइनेछ।
हाफ म्याराथनमा विजेताले १ लाख, दोस्रोले ७५ हजार र तेस्रोले ५० हजार रुपैयाँ प्राप्त गर्नेछन्। अन्य विधामा विजेताले १० हजार, दोस्रोले ७ हजार र तेस्रोले ५ हजार रुपैयाँ पुरस्कार पाउनेछन्।
सेनाले म्याराथनमा २५०, हाफ म्याराथनमा ६००, १० किमीमा ८००, ५ किमी दौड तथा वाकाथनमा ५५० र अफिसियल ३०० गरी करिब २ हजार ५ सय जनाको सहभागिता रहने विश्वास लिएको छ।
भद्रकालीस्थित जंगी अड्डाबाट सुरु हुने म्याराथन सहरका विभिन्न भाग परिक्रमा गरी पुनः सोही स्थानमा आएर सम्पन्न हुनेछ।
