विराटनगर- विराटनगर महानगरपालिका-२ स्थित विराट क्षितिज कलेजले बीएस्सी सीएसआईटी र बीसीए कार्यक्रमका नवआगन्तुक विद्यार्थीहरूलाई अभिमुखीकरण प्रदान गरेको छ।
शैक्षिक सत्र २०८३ मा भर्ना भएका बीएस्सी सीएसआईटी र बीसीए कार्यक्रमका विद्यार्थीका लागि असोज १७ र १८ गते इलामको कन्यामस्थित जंगल रिसोर्टमा अभिमुखीकरण कार्यक्रम आयोजना गरिएको हो।
त्रिभुवन विश्वविद्यालयले तोकेको कोटाअन्तर्गत कलेजमा बीएस्सी सीएसआईटीमा ३६ जना र बीसीएमा ३५ जना नयाँ विद्यार्थी भर्ना भएका छन्। कार्यक्रममा उनीहरूलाई सम्बन्धित विषयको अध्ययन पद्धति, पाठ्यक्रम, शैक्षिक अवसर तथा सूचना प्रविधिको क्षेत्रमा विकसित भइरहेका सम्भावनाबारे जानकारी दिइएको थियो।
कलेजका अध्यक्ष दिनेशकुमार दाहालको अध्यक्षतामा सम्पन्न कार्यक्रममा राष्ट्रिय योजना आयोगका सदस्य प्राध्यापक डा. सुदन झा प्रमुख अतिथि र मेची क्याम्पसका बीएस्सी सीएसआईटी कार्यक्रमका कोअर्डिनेटर सुनिल शर्मा विशिष्ट अतिथिका रूपमा सहभागी थिए।
कार्यक्रममा विराट क्षितिज कलेजका क्याम्पस प्रमुख खुशीराज श्रेष्ठ, सञ्चालकहरू आयुष लम्साल, सागर श्रेष्ठ, सुशील घिमिरे र कृष्णबहादुर भण्डारीलगायत पनि सहभागी थिए।
अभिमुखीकरणका क्रममा विद्यार्थीलाई बीएस्सी सीएसआईटी र बीसीएको अध्ययन संरचना, पाठ्यक्रम तथा प्रयोगात्मक शिक्षाको महत्त्वबारे जानकारी गराइएको थियो। सूचना प्रविधिको क्षेत्रमा तीव्र रूपमा भइरहेको विकाससँगै दक्ष जनशक्तिका लागि सिर्जना भइरहेका अवसरबारे समेत विद्यार्थीहरूलाई अवगत गराइएको थियो।
कार्यक्रममा अघिल्ला ब्याचका विद्यार्थीहरूले विभिन्न सांस्कृतिक प्रस्तुति प्रस्तुत गर्दै नयाँ विद्यार्थीलाई स्वागत गरेका थिए।
