काठमाडौं । ठगी, सम्पत्ति शुद्धीकरण सम्बन्धी गतिविधि भएको भन्दै सामाजिक सञ्जाल टेलिग्रामलाई बन्द गर्ने तयारी गरिएको छ ।
प्रधानमन्त्री तथा मन्त्रिपरिषदमा रहेको सम्पत्ति शुद्धीकरण तथा आतंकवादी क्रियाकलापमा वित्तीय लगानी कसूर निवारण सम्बन्धी राष्ट्रिय समन्वय समितिले मेसेजिङ एप टेलिग्रामलाई बन्द गराउन प्रक्रिया अघि बढाएको हो ।
सम्पत्ति शुद्धीकरणको ग्रे लिस्टबाट देशलाई निकाल्ने नाममा सरकारले टेलिग्राम बन्द गराउने रणनीति अघि बढाएको हो ।
समितिले सूचना तथा सञ्चार मन्त्रालयलाई बिहीबार पत्र पठाउँदै एपमाथि आवश्यक कदम चाल्न निर्देशन दिएको मन्त्रालयले जानकारी दिएको छ ।
टेलिग्राममार्फत् ठगी, लागूऔषध कारोबार, हुन्डी र अन्य आपराधिक गतिविधि तीव्र रूपमा भइरहेको समितिको निष्कर्ष छ ।
साथै नेपालमा एपको सम्पर्क व्यक्ति पनि नभएका कारण यो एप बन्द गरिनुपर्ने समितिको सुझाव छ ।
सम्पत्ति शुद्धीकरणसम्बन्धी गतिविधि भएको आशंकामा सरकार टेलिग्राम प्रति निर्मम देखिएको हो ।
आगामी सोमबारसम्ममा सरकार जसरी पनि टेलिग्राम बन्द गर्ने नियत लिएर अघि बढेको छ ।
‘नेपाल सम्पत्ति शुद्धीकरणको ग्रे-लिस्टमा परेको छ। त्यसबाट नेपाललाई बाहिर निकाल्न प्रधानमन्त्री केपी शर्मा ओलीबाटै कडा निर्देशन र दबाब छ ।
टेलिग्रामलाई यही निहुँमा बन्द गर्दा सम्पत्ति शुद्धीकरणमा नेपाल कठोर छ भन्ने सन्देश अन्तर्राष्ट्रियस्तरमा पनि जान्छ र यसमा काम गरेको देखिने भएकाले सरकार आक्रामक बनेको हो,’ स्रोतले भन्यो।
सञ्चार मन्त्रालयले टेलिग्रामको कुनै आधिकारिक प्रतिनिधिसँग अझैसम्म यस विषयमा कुराकानी गर्न सकेको छैन ।
मन्त्रालयका सहसचिव गजेन्द्रकुमार ठाकुरले आफूहरुले टेलिग्रामका प्रतिनिधिसँग छलफल गर्न चाहे पनि कुनै सम्पर्क व्यक्ति वा आधिकारिक माध्यम फेला पार्न नसकेको जानकारी दिए ।
टेलिग्राम सञ्चार मन्त्रालयमा सूचीकरणसमेत भएको छैन। नेपालको कानुनविपरीत काम गरेको फेला परे कारवाही गरिने उनले बताए ।
सञ्चार मन्त्रालय बिहीबारबाटै टेलिग्रामविरुद्ध प्रमाण जुटाउन लागिपरिसकेको छ । टेलिग्राम संलग्न हुन सक्ने सम्भावित कडी मन्त्रालयले खोजिरहेको छ ।
‘सम्पत्ति शुद्धीकरण आकर्षित हुने हुण्डी, सट्टेबाजी, अवैध धनको कारोबारीहरु टेलिग्राममा सक्रिय भेटेका छौं । केही प्रमाण भेटेकाले सञ्चार मन्त्रालयालाई कारवाही अघि बढाउन पत्राचार गरेका हौं । यी प्रमाण उहाँहरूलाई बुझाउँछौं । टेलिग्राम हाम्रो टार्गेटमा परिसक्यो,´ प्रधानमन्त्री कार्यालयका एक अधिकारीले भने ।
नेपालमा पनि २०८१ पुसमा एफवान सफ्टको प्रणाली ह्याक गरेर सिटिन्स बैंकको खाताबाट साढे ३ करोड रुपैयाँ चोरी भएको घटनामा टेलिग्राम जोडिएको थियो ।
त्यसबेला ह्याकरले टेलिग्राममार्फत बेरोजगार युवालाई प्रलोभन देखाएर रकम चोरी गरेको खुलेको थियो ।
लागूऔषध कारोबारमा समेत यसको प्रयोग हुने गरेको आशंका छ ।
