विराटनगर । क्रिस्टियानो रोनाल्डोले क्लब परिवर्तन गरेर क्लब विश्वकप खेल्ने भन्दा पनि विश्राम र तयारीमा ध्यान दिनु आफ्नो प्राथमिकता भएको बताएका छन्।
४० वर्षका पोर्चुगिज स्टार रोनाल्डोले आफ्नो टोली अल–नासरसँग दुई वर्षको नयाँ सम्झौता गरेका छन्। त्यसपछि उनले सामाजिक सञ्जालमार्फत आफ्नो योजनाबारे प्रस्ट पारेका हुन्।
‘मसँग क्लब विश्वकप खेल्ने केही प्रस्तावहरू थिए,’ उनले अल–नासरको इन्स्टाग्राम भिडियोमा भने, ‘तर, त्यो मलाई उपयुक्त लागेन। मलाई राम्रो विश्राम, राम्रो तयारी चाहिएको छ, किनभने यो सिजन निकै लामो हुनेछ। यो सिजनको अन्त्यमा विश्वकप पनि छ। त्यसैले म अल– नासरका लागि मात्र होइन, राष्ट्रिय टोलीका लागि पनि पूर्ण रूपमा तयार रहन चाहन्छु।’
तीन हप्ताअघि स्पेनविरुद्ध पेनाल्टी सुटआउट जित्दै पोर्चुगललाई नेसन्स लिग उपाधि दिलाएका रोनाल्डो क्लब विश्वकप खेल्न अर्को क्लबमा जाने चर्चा चलेको थियो। तर, उनले ती सबै कुरा अफवाह मात्रै रहेको प्रमाणित गर्दिए।
अमेरिका, क्यानडा र मेक्सिकोले संयुक्त रूपमा आयोजना गर्ने आगामी वर्षको फिफा विश्वकपमा रोनाल्डो र अर्जेन्टिनी स्टार लिओनेल मेसी छैटौं पटक खेल्ने सम्भावना छ। सन् २०२२ मा रोनाल्डो पाँच वटा विश्वकपमा गोल गर्ने पहिलो पुरुष खेलाडी बनेका थिए।
पाँचपटकको बालोन डि’ओर विजेता रोनाल्डोको नयाँ सम्झौतासँगै कम्तीमा ४२ वर्षको उमेरसम्म व्यावसायिक फुटबल खेल्ने निश्चित भएको छ।
