विराटनगर । विराटनगरमा जारी चौथो संस्करणको ‘इक्वालिटी कप क्रिकेट’ प्रतियोगिताको उपाधिका बिहीबार लागि मोरङ र सप्तरी भिड्ने भएका छन् ।
विराटनगर महानगरपालिका-६ मा रहेको म्यारिलिबोन ज्वाला क्रिकेट मैदानमा भोलि हुने फाइनल खेलमा मोरङ र सप्तरीले प्रतिस्पर्धा गर्ने भएका हुन् ।
नेपाल क्रिकेट फाउन्डेसनको आयोजनामा जारी प्रतियोगिताअन्तर्गत अन्तिम लिग खेलमा विजयी हुँदै मोरङ शीर्ष स्थानमा रह्यो ।
बुधबार मोरङले सप्तरीलाई ७ विकेटले पराजित गर्यो । यसअघि नै मोरङ र सप्तरी फाइनलको यात्रा तय गरेका थिए ।
मोरङ खेलेको तीनै खेलमा जित हात पार्दै ६ अंक जोड्न सफल हुँदा सप्तरी तीन खेलमध्ये दुई खेलमा जित हात पार्दै ४ अंकका साथ दोस्रो स्थानमा रह्यो ।
टस जितेर ब्याटिङ गरेको सप्तरीले निर्धारित २० ओभरमा ४ विकेट गुमाई ८१ रन जोडेको थियो ।
सप्तरीकी साक्षी यादवले सर्वाधिक अविजित ४२ रन जोडिन् । मोरङकी निरु राजवंशीले १ विकेट लिँदा फुलकुमारी राजवंशी र बन्धना राजवंशी र क्रितीषा राजवंशीले १–१ विकेट लिइन् ।
८२ रनको लक्ष्य पछ्याएको मोरङले १० दशमलव ५ बलमा ३ विकेट गुमाई सो विजयी लक्ष्य पार गरेको थियो ।
मोरङको जितमा प्लेयर अफ द म्याच टिका साहले ४१ रन बनाउँदा प्रिन्साा राना मगरले अविजित १५ रनको योगदान दिइन् ।
टिकाले ३० बलमा ६ चौका प्रहार गरिन् । सप्तरीकी दिपा रामले २ विकेट लिइन् ।
यसअघि भएको पहिलो खेलमा सिरहाले इलामलाई १ सय ३३ रनको पराकिलो अन्तरले पराजित गर्दै प्रतियोगितामा पहिलो जित हात पार्यो ।
दुवै टिमले लगातार खेलमा पराजित हुँदै प्रतियोगिताबाट बाहिरिसकेको छ । सिरहाले ३ खेलमा १ मा जित हात पार्दै २ अंक बटुलेको छ भने इलामले तीनै खेलमा पराजित भएको छ ।
टस हारेर ब्याटिङ गरेको सिरहाले निर्धारित २० ओभरमा ४ विकेट गुमाउँदै १ सय ९५ रनको विशाल योगफल तयार पारेको थियो ।
सिरहाकी प्लेयर अफ द म्याच सरस्वती चौधरीले अविजित ७८ रन बनाउँदा मिना महतोले २६ रनको योगदान दिइन् । चौधरीले ६२ बलमा १० चौका प्रहार गरिन् ।
इलामकी मुना राई, टिकामाया तामाङ, प्रयंका राई र रञ्जना लिम्बुले समान १–१ विकेट लिएकी थिइन् ।
१ सय ९६ रनको विशाल लक्ष्य पछ्याएको इलामले १६ दशमलव ४ बलमा सवै विकेट गुमाई ६२ रन बनाएको थियो । इलामकी दिपा लिम्बु सर्वाधिक ११ रन बनाइन् ।
सिरहाकी अनु यादवले ३ विकेट लिँदा प्रसिद्का खडकाले पनि ३ विकेट लिइन् ।
म्यारिलबोन क्रिकेट क्लब फाउन्डेसन र क्रिकेट विथआउट बाउण्ड्रिजको सहयोगमा क्रिकेटमा महिलाको सहभागिता अभिवृद्धि अभियानअन्तर्गत इक्युवालिटी कप क्रिकेट आयोजना भएको हो ।
