विराटनगर । १८औं संस्करणको इन्डियन प्रिमियर लिग (आइपिएल) अन्तर्गत गएराति भएको खेलमा सनराइजर्स हैदरावाद पराजित भएको छ ।
सुरुमा ब्याटिङ गरेको हैदरावादलाई लखनउ सुपर जायन्ट्सले पाँच विकेटले हराएको हो ।
आक्रामक ब्याटिङ लाइनअपका रुपमा चिनिने अभिषेक शर्मा, इशन किशन र नितिशकुमार रेड्डी, हेनरिक क्लासेन नचल्दा हैदरावाद पराजित भएको हो ।
टस जितेर लखनउले फिल्ड रोजेपछि पहिला ब्याटिङ गरेको हैदरावादले ९ विकेटको क्षतिमा १९० रन बनाएको थियो ।
१९१ रनको लक्ष्य पछ्याएको लखनउले आक्रामक ब्याटिङ गर्दै १६.१ बलमा पाँच विकेटको क्षतिमा १९३ रन बनायो ।
यो सनसनीपूर्ण जितसँगै लखनउले दुई खेल खेलेर दुई अंक जोडेको छ। पहिलो खेलमा लखनउ दिल्ली क्यापिटल्ससँग मात्र एक विकेटले पराजित भएको थियो ।
यो सिजनमा हैदरावादको पहिलो हार हो । उसले पहिलो खेलमा राजस्थान रोयल्सलाई ४४ रनले पराजित गरेको थियो ।
पहिलो खेलमा २८७ रनको पारी खेलेको हैदरावाद दोस्रो खेलमा १९० रनमा समेटिएको हो ।
हैदरावादविरुद्धको जितमा लखनउका निकोलस पुरनले सर्वाधिक ७० रन बनाए। २६ बल खेलेका उनले ६ चौका र ६ छक्का हिर्काए ।
ओपनर मिचेल मार्शले ३१ बलमा सात चौका र दुई छक्कासहित अर्धशतक पूरा गर्दै ५२ रन जोडे । कप्तान ऋषभ पन्त १५ रनमा आउट हुँदा डेभिड मिलर १३ र अब्दुल समाद २२ रन नटआउट रहे ।
हैदरावादका कप्तान प्याट कमिन्सले सर्वाधिक दुई विकेट लिए। तीन ओभर बलिङ गरेका उनले २९ रन खर्चिए। मोहम्मद शामी, एडम जाम्पा र हर्षल पटेलले समान एकएक विकेट हात पारे ।
राजीव गान्धी स्टेडियममा टस हारेर पहिला ब्याटिङ गरेको हैदरावादले पूरै २० ओभर खेल्दै नौ विकेटको क्षतिमा १९० रन बनाउँदा कुनै पनि ब्याट्सम्यानले अर्धशतक बनाउन सकेनन् ।
हैदरावादका ओपनर ट्रेभिस हेडले २८ बल खेलेर सर्वाधिक ४७ रन बनाउँदा पाँच चौका र तीन छक्का हिर्काए ।
अंकत बर्माले १३ बलमा पाँच छक्कासहित ३६ रन बनाए भने नितिशकुमार रेड्डी ३२ र हेनरिक क्लासन २६ र प्याट कमिन्स १८ रनमा आउट भए ।
उसका लागि हर्षल पटेल १२ रनमा नटआउट रहे। हैदरावादका लागि आक्रामक ब्याटिङ लाइन चलेन ।
हैदरावादलाई सस्तैमा समेट्न लखनउका शार्दुल ठाकुर घातक भए । उनले चार ओभर बलिङ गर्दा मात्र ३४ रन खर्चिएर चार विकेट लिए ।
आवेश खान, दिग्वेश राठी, रवि बिश्नोई र राजकुमार यादवले एकएक विकेट हात पारे ।
