विराटनगर । विराटनगर किंग्सले काठमाडौंमा जारी नेपाल प्रिमियर लिग (एनपिएल) मा कीर्तिमानी जित निकालेको छ ।
कीर्तिपुरस्थित टियु मैदानमा भएको खेलमा विराटगरले लुम्बिनी लायन्सविरुद्ध २ विकेटको जित दर्ता गरेको हो ।
विराटनगरको यो पहिलो जित हो । यसअघि दुई खेलमा हार बेहोरेको उसले तीन खेलमा २ अंक जोडेको छ ।
विराटनगर अंकतालिकाको चौथो स्थानमा छ ।
बिहीबार ओपनर लोकेश बमको विस्फोटक ब्याटिङमा विराटनगरले कीर्तिमानी लक्ष्य पूरा गरेको थियो ।
लुम्बिनीले दिएको १ सय ९२ रनको विशाल लक्ष्य पछ्याएको विराटनगरले १ बलअगावै ८ विकेटको क्षतिमा भेट्टायो।
विराटनगरका ओपनर लोकेश बम ४७ बलमा ३ चौका र ५ छक्का सहयोगमा ७१ रन बनाउँदै पेभेलियन फर्के ।
मार्टिन गुप्टिल २८ रन बनाउँदा दुर्गेस गुप्ताको बलमा बोल्ड आउट भए । बसिर अहमद ४० रन बनाउँदा क्याच आउट हुन पुगे। प्रतिस जिसी ६ रनमा पेभेलियन फर्के ।
लुम्बिनीका दुर्गेश गुप्ताले तीन विकेट झारे। साद विन जफर र रामोन सिमोन्डले समान दुई विकेट लिए । विवेक यादवले एक विकेट लिए ।
त्यसअघि विराटनगरले टस जितेर पहिले फिल्डिङ रोजेपछि ब्याटिङ गरेको लुम्बिनीले निर्धारित २० ओभरमा ७ विकेटको क्षतिमा १ सय ९१ रनको योगफल तयार पारेको थियो ।
एनपीएलमा पहिलो खेल खेलिरहेको लुम्बिनीले अहिलेसम्मकै ठूलो योगफल तयार पारेको हो ।
यसअघि सुदूरपश्चिमले विराटनगरविरुद्ध नै १ सय ८२ रनको विशाल योगफल तयार पारेको थियो ।
कप्तान रोहित पौडेलले बनाएको ४६ रन नै लुम्बिनीका लागि सर्वाधिक रह्यो ।
कप्तान रोहितले २९ बलमा ४ चौका र २ छक्का प्रहार गर्दा राजेश पुलामीको बलमा प्रतिश जिसीको हातबाट क्याच आउट भए ।
१७ बलमा १ चौका र ३ छक्का प्रहार गर्दै ३० रन बनाएका टम मोर्स रन आउट भए ।
ओपनर आशुतोष घिरैया १५ रन बनाउँदै रन आउट भए । अर्जुन साउद १७ रनमा इस्मत आलको बलमा बोल्ड आउट भए। सन्दीप जोरा १२ रनमा रनआउट हुन पुगे ।
साद विन जफर १५ रन बनाउँदा सन्दीप लामिछानेको बलमा मार्टिन गुप्टिलको हातबाट क्याच आउट भए । वेन कटिङ ६ रनमा रनआउट भए ।
विवेक यादव १९ र रेमोन सिमोन्ड २ रनमा अविजित रहे। लुम्बिनीका चार खेलाडी रन आउट भए ।
विराटनगरका लागि कप्तान सन्दीप लामिछाने, इस्मत आलम र राजेश पुलामीले समान एक विकेट लिए ।
