विराटनगर । नेपाल प्रिमियर लिगआबद्ध कर्णाली याक्सले हालसम्मको ठुलो खरिदका रूपमा भारतीय क्रिकेटर शिखर धवनलाई भित्र्याएको छ ।
कर्णालीले भारतीय राष्ट्रिय क्रिकेट टीमका पूर्वओपनर धवनलाई भित्र्याएको छ । धवनले कम्तीमा चार खेल खेल्ने बताइएको छ ।
कर्णाली याक्सको मार्की खेलाडी (कप्तान) मा राष्ट्रिय टिमका तीव्र गतिका बलर सोमपाल कामी छन् । सोमपालकै कप्तानीमा धवनले एनपिएल खेल्ने छन् ।
फ्रेन्चाइजका सहमालिक गृहेन्द्र घिमिरेका अनुसार यस विषयमा पहिले नै समझदारी भइसकेको छ ।
सोमपालको कप्तानीमा खेल्ने विषयमा धवनले कुनै पनि आनाकानी पनि गरेका छैनन् ।
धवनको इन्ट्रीसँगै कर्णाली याक्सले चार जना विदेशी खेलाडीको न्यूनतम कोटा पूरा गरेको छ । थप एकजना खेलाडीसँग कुराकानी भइरहेको बताइएको छ ।
यस्तै, टोलीमा राष्ट्रिय टोलीबाट खेलिरहेका गुल्शन झा, देव खनालसहित नन्दन यादव छन् ।
कर्णाली याक्सले वेष्ट इन्डिजका चादविक एन्टोनिओ किर्कपाट्रिक वाल्टन, पाकिस्तानका अलराउन्डर मोहम्मद हुसैन तलात र हङकङका बाबर हायतलाई अनुबन्ध गरिसकेको छ ।
नेपाली अन्य खेलाडीमा ‘बी’ श्रेणीबाट अर्जुन घर्तीसहित रित गौतम, मौसम ढकाल र भुवन कार्की छन् । ‘सी’ श्रेणीबाट दीपेन्द्र रावत र युनिशविक्रम सिंह ठकुरीसँगै दीपक डुम्रे छन् ।
एनपिएल प्रतियोगिता मंसिर १५ देखि पुस ६ सम्म हुँदै छ ।
