विराटनगर । मोरङको बेलबारी नगरपालिकामा सम्पन्न सातौं संस्करणको अन्तर्राष्ट्रिय आमन्त्रण बेलबारी गोल्डकपको उपाधि झापा–११ फुटबल क्लबले जितेको छ ।
बेलबारी–११ स्थित लक्ष्मी खेल मैदानमा शनिबार भएको फाइनलमा सलहेस फुटबल क्लब सिराहालाई टाइब्रेकरमा ५–३ गोलले हराउँदै झापाले उपाधि रक्षा गरेको हो ।
निर्धारित समय १-१ गोलको बराबरीमा सकिएपछि भएको टाइब्रेकरमा झापा भाग्यमानी सावित भएको हो ।
पहिलो हाफ गोलरहित बराबरीमा सकिएको खेलको ५०औँ मिनेटमा सलहेशका अजयी मार्टिनले हेड गोल गर्दै अग्रता दिलाएका थिए ।
तर, ७१औँ मिनेटमा झापाका प्रदीप बुढाथोकी गोल गर्दै खेललाई बराबरीमा ल्याए ।
निर्धारित ९० मिनेटपछि टाइब्रेकरमा पुगेको खेलमा झापा भाग्यमानी बन्यो ।
टाइब्रेकरमा झापालाई जिताउन दिनेश उराव, अभिषेक गुरुङ, सौरभ लिम्बू, उत्सव राई र देवेन्द्र तामाङले गोल गरे।
सलहेशको राम थापा, आदित्य शाक्य र विप्लव गुरुङले मात्र गोल गरे भने सलहेशका समीर तामाङको प्रहार झापाका गोल रक्षक सन्दीप लिम्बूले बचाए ।
फाइनल खेलको म्यान अफ दि म्याच भएका अभिषेक गुरुङले पाँच हजार रुपैयाँ पाए ।
झापाका सन्दीप लिम्बू उत्कृष्ट गोलरक्षक, उत्सव राई उत्कृष्ट मिडफिल्डर, सन्तोष गुरुङ उत्कृष्ट प्रशिक्षक र देवेन्द्र तामाङ सर्वश्रेष्ठ खेलाडी घोषित भए ।
तामाङलाई १० हजार र अन्य खेलाडीलाई जनही सात हजार रुपैयाँ पुरस्कार प्रदान गरियो ।
सलहेशका अजयी मार्टिन सर्वाधिक गोलकर्ता बने । उनले पाँच गोल गरेका थिए ।
सलहेशकै समीर तामाङले उत्कृष्ट स्ट्राईकरको पुरस्कार स्वरूप सात हजार रुपैयाँ पाए ।
यस्तै, उपाधिसँगै झापाले आठ लाख रुपैयाँ पुरस्कार पायो भने उपविजेता सलहेस सिराहाले चार लाख रुपैयाँ पायो ।
विजयी टिमका खेलाडीलाई कोशी प्रदेश सरकारका सामाजिक विकास मन्त्री पाँचकर्ण राईलगायतले पुरस्कार प्रदान गरे ।
सिराहाले शुक्रबार सम्पन्न दोस्रो सेमिफाइनलमा काठमाडौंको चित्लाङ फुटबल क्लबलाई ५–१ गोलको फराकिलो अन्तरले हराउँदै झापासँगको उपाधि भिडन्त पक्का गरेको थियो ।
त्यसअघि पहिलो सेमिफाइनलमा बुटवल लुम्बिनीमाथि २-० गोलको जित निकाल्दै झापाले फाइनलमा स्थान पक्का गरेको थियो ।
