विराटनगर । अमेरिकाविरुद्धको टी-२० आई सिरिजमा नेपालले सुखद सुरुवात गरेको छ । शुक्रबार भएको खेलमा नेपालले अमेरिकालाई उसैको मैदानमा १७ रनले हराएको हो ।
टेक्ससको डालासस्थित ग्रान्ड प्रेरी क्रिकेट स्टेडियममा बिहान पौने ६ बजे सुरु भएको खेलमा अमेरिकाले टस जितेर नेपाललाई ब्याटिङको निम्तो दिएको थियो ।
नेपालले अमेरिकालाई निर्धारित २० ओभरको खेलमा ९ विकेट गुमाउँदै १ सय ६५ रनको चुनौती दिएको थियो ।
नेपालले दिएको लक्ष्य पछ्याउने क्रममा अमेरिका २० ओभरमा ७ विकेट गुमाएर १४७ रनमा समेटियो ।
नेपालका लागि कप्तान रोहित कुमार पौडेलले ४९ रन बनाए ।
साथै दिपेन्द्र सिहं एरीले २८ रन बनाउँदा आसिफ सेख र अनिल शाहले समान २७/२७ रन बनाए ।
गुल्शन झाले ११ रन बनाउदा कुशल भर्तेल १० रनमा आउट भए ।
यसैगरी सोमपाल कामीले २ रन मात्र बनाउन सके ।
नेपालले दिएको १६५ रनको लक्ष्य पछ्याएको अमेरिकाले २० ओभरमा ७ विकेट गुमाउँदै १४७ रन मात्र बनाउन सक्यो ।
अमेरिकाका लागि शायन जहाँगीर ६० रनको अर्धशतकीय इनिङ खेले पनि जितका लागि पर्याप्त हुन सकेन ।
आन्द्रेस गौसले ३० र मिलिन्द कुमारले २२ रन जोडेर आउट भए ।
बलिङमा नेपालका दीपेन्द्रसिंह ऐरीले ३, रिजन ढकाल, करण केसी र गुल्सन झाले एक-एक विकेट लिए ।
अब, दोस्रो खेल आइतबार बिहान र तेस्रो तथा अन्तिम टी-२० आई सोमबार बिहान हुनेछ । यो सिरिजपछि नेपाल, अमेरिका र स्कटल्यान्डबीच लिग-टू का खेल हुनेछन् ।
लिग-टू सिरिज २५ अक्टोबरदेखि डालास मै सुरु हुनेछ । रोहित पौडेलको टोली क्यानडामा लिग टू र टी-२० आई सिरिज खेलेर त्यहीँबाट अमेरिका गएको हो ।
