विराटनगर । अमेरिकन मेजर लिग सकरमा उपाधि दाबेदार रहेको इन्टर मियामीले अर्को एउटा जित दर्ता गरेको छ । आइतबार बिहान भएको खेलमा मियामीले फिलाडेल्फियालाई ३-१ गोलले हराएको हो ।
घरेलु मैदानमा मियामीलाई जिताउन कप्तान लियोनल मेस्सीले दुई गोल गर्दा लुइस स्वारेजले एक गोल गरे । पाहुना टोलीका माइकल उरेले एक गोल गरे ।
खेलको दोस्रो मिनेटमा नै उरेले गोल गर्दै फिलाडेल्फियालाई सुरुआती अग्रता बनाएका थिए । तर, खेलको २६औं मिनेटमा मेस्सीले गोल गर्दै घरेलु टिमलाई खेलमा फर्काए ।
त्यसको चार मिनेटपछि नै मेस्सीले दोस्रो गोल गर्दै मियामीलाई अग्रता दिलाए । खेलको इन्ज्युरी समयमा मेस्सीकै पासमा स्वारेजले गोल गरेपछि मियामी ३-१ गोलले विजयी भएको हो ।
चोटका कारण दुई महिनाको विश्रामपछि शुक्रबारबाट प्रशिक्षणमा फर्किएका मेस्सी आजबाटै मैदान उत्रिएका हुन् ।
