विराटनगर । लिम्बु संस्कृतिमा आधारित चलचित्र ‘सुगुप’ सोमबार विराटनगरमा पनि प्रर्दशन गरिएको छ । विराटनगरको सेन्ट्रल मल्टिप्लेक्समा सोमबार सुगुपको बिशेष प्रर्दशन गरिएको हो ।
हङकङसहित नेपालका विभिन्न ४ सहरपछि लिम्बु समुदायको संस्कृतिमा आधारित चलचित्र सुगुपको पाँचौं प्रिमियर विराटनगरमा सम्पन्न भएको छ ।
दर्शकको हाउसफुल सहभागितासहित विराटनगरमा सुुगुपको बिशेष प्रर्दशन गरिएको हो ।
हङकङका युवा व्यावसायी रविन कुमार नाल्बो लिम्बु मुख्य निर्माता रहेको चलचित्र लोकेन साँवा लिम्बुको निर्देशनमा सम्पन्न भएको हो ।
भारतको आसाम, नेपालको ताप्लेजुङ, पाँचथरको याङ्वरक, तेह्रथुम, काठमाडौं र मकवानपुरको कुलेखानी लगायतका पर्यटकीय क्षेत्रमा छायाङ्कन गरिएको चलचित्रमा मौसम लिम्बु, सुम्निमा खापुङ, बबिता नेयोङहाङको मुख्य भूमिका छ ।
चलचित्रबाट लिम्बु भाषा तथा संस्कृति र रितिरिवाजको संरक्षणमा बिशेष जोड दिन खोजिएको दर्शकहरुले बताएका छन् ।
लिम्बु जातिमा प्रसव पिडासहित बच्चा जन्माउँदै गर्दा रगत बगेर सुत्केरीको मृत्यु हुने महिलालाई सुगुप भन्ने गरिन्छ ।
चलचित्रको माध्यमबाट सुगुपको अर्थ समेत स्पष्ट पार्ने प्रयास गरिएको बताईएको छ ।
चलचित्रबाट गर्भवती महिलाको स्वास्थ्य संवेदनशीलता र पहाडको विकट भौगोलिक परिवेशलाई झल्काउन खोजिएको निर्माताहरूले बताएका छन् ।
उनीहरुका अनुसार चलचित्रमा लिम्बु समुदायको मौलिकता र गरिब परिवारको आर्थिक/सामाजिक अवस्थालाई पनि विभिन्न माध्यमबाट चित्रण गर्ने प्रयास गरिएको छ ।
लिम्बु समुदायको संस्कार संस्कृतिको संरक्षण नै चलचित्रको मुख्य सन्देश रहेको निर्देशक लोकेन साँवा लिम्बुले बताउँछन् ।
लिम्बु भाषा तथा संस्कृतिमा आधारित चलचित्र सुगुपको पहिलो प्रिमियर शो गत माघ २७ गते हङकङको वाम्पोआस्थित गोल्डेन हार्पेस्ट सिनेमा हलमा गरिएको थियो ।
दर्शकहरुको सकारात्मक प्रतिक्रियापछि निमार्णपक्षले चलचित्रको दोश्रो बिशेष प्रर्दशनी काठमाडौंमा गरेको थियो ।
त्यसपछि अहिलेसम्म सुनसरीको धरान, इटहरी र चक्रघट्टी तथा मोरङको पथरी र विराटनगरमा चलचित्रको बिशेष प्रर्दशनी भइसकेको छ ।
आगामी चैत्र ३ गते झापाको दमकमा समेत चलचित्र प्रर्दशनको तयारी रहेको निमार्ण पक्षले जनाएको छ ।
विराटनगरमा भने सोमबार किरात याक्थुङ चुम्लुङ, किरात राई यायोक्खा र किरात याक्खा छुम्मा लगायतका संस्थाको संयुक्त आयोजनामा चलचित्र सुगुपको बिशेष प्रर्दशनी गरिएको थियो ।