निर्देशक धीराज राजवंशीको डेब्यू निर्देशकीय चलचित्र ‘हिमालयन गोल्ड’ को काठमाडौंमा प्रिमियर गरिएको छ। बुधबार ठमेलस्थित छायाँ सेन्टरमा आयोजित प्रिमियरमा सहभागी दर्शक तथा सेलिब्रेटीले चलचित्रको कथावस्तु, हिमाली दृश्य, कलाकारको अभिनय र प्रस्तुतिको प्रशंसा गरेका छन्।
थ्रिलर तथा ड्रामा विधामा निर्माण भएको चलचित्रले हिमाली क्षेत्रमा पाइने बहुमूल्य जडीबुटी यार्सागुम्बाको लोभमा उत्पन्न हुने द्वन्द्व, संघर्ष र मानवीय स्वार्थको कथा प्रस्तुत गर्छ। सन् १९९० को परिवेशमा आधारित चलचित्रमा यार्सागुम्बा संकलनदेखि त्यसको लुटपाट र सुरक्षाका लागि गरिने संघर्षलाई मुख्य विषय बनाइएको छ।
चलचित्रको कथामा आफू र परिवारले मेहनत गरेर संकलन गरेको यार्सागुम्बा जोगाउन एक युवतीले निर्दयी समूहसँग गर्ने संघर्षलाई देखाइएको छ। अस्तित्वको लडाइँ, प्रतिशोध र साहसलाई समेत समेटिएको चलचित्रले हिमाली समुदायको जीवनशैली र आर्थिक निर्भरतालाई उजागर गर्ने प्रयास गरेको छ।
‘हिमालयन गोल्ड’ को अर्को विशेषता यसको छायांकनस्थल हो। समुद्री सतहबाट करिब ४ हजार ८०० मिटर उचाइमा छायांकन गरिएको चलचित्रमा रुकुम, डोल्पा, रोल्पा र मनाङका हिमाली क्षेत्र तथा त्यहाँका समुदायको यार्सागुम्बासँग जोडिएको जीवनलाई पर्दामा उतारिएको छ।
चलचित्रले नेपालमा एडल्ट (ए) र भारतमा यूए १६ प्लस प्रदर्शन प्रमाणपत्र प्राप्त गरिसकेको छ। चलचित्रमा सुनील थापा, कर्मा शाक्य, परीक्षा लिम्बू, मेनुका प्रधान, राहुल एन. मुखिया, अङ्कित खड्का, सुनील तामाङ, तेन्जिङ ठकुरी, सविता अधिकारी र ऋषिकेश बस्याललगायत कलाकारको अभिनय छ।
ह्वाइट एलिफेन्ट मोसन पिक्चर प्रोडक्सनको ब्यानरमा बनेको चलचित्रको कथा तथा निर्देशन धीराज राजवंशीले गरेका हुन्। पटकथा दीपेन्द्र गौचन र राजवंशीले लेखेका छन्। चलचित्रका निर्माता मीनबहादुर भाम, सहनिर्माता सुयश ज्ञवाली र कार्यकारी निर्माता राजु राजवंशी हुन्।
चलचित्रको वितरण पनि विभिन्न देशमा फरक कम्पनीले गर्ने भएका छन्। भारतमा प्रतिष्ठित वितरण कम्पनी एए फिल्म्सले चलचित्र वितरण गर्नेछ भने नेपालमा एप्पल इन्टरटेनमेन्ट, जापानमा टोकियो ड्रिम इन्टरटेनमेन्ट र मध्यपूर्वमा फार्स फिल्म मोसन पिक्चर्सले वितरणको जिम्मेवारी लिएका छन्।