रामचरन तेजा र जुनियर एनटीआर अभिनित दक्षिण भारतीय फिल्म ‘आरआरआर’ ले बलिउड बक्स अफिसमा तहल्का मच्चाइ रहेको छ ।
गत शुक्रबारबाट हलमा रिलिज भएको फिल्मले पहिलो दिनमा नै विश्वभरबाट दुई सय २३ करोडको बक्स अफिस क्लेक्सन गरेको थियो ।
त्यसयता पनि नियमित आकर्षक कमाई गरिरहेको फिल्मले चौथो दिनसम्म आइपुग्दा पाँच सय करोडको व्यापार गरिसकेको छ ।
आरआरआरको हिन्दी संस्करणले मात्रै सय करोडको व्यापार गरिसकेको छ ।
भारतका विभिन्न भाषामा प्रदर्शन गरिएको यो फिल्मले सबै भाषाबाट राम्रो कमाई गरिरहेको भारतीय सञ्चारमाध्यमले बताएका छन् ।
बलिउडका व्यापार विश्लेषक तरण आदर्शका अनुसार ‘आरआरआर’ ले कोभिड महामारीपछि हिन्दी चलचित्र हलहरुमा दर्शकको बाढी नै ल्याइदिएको छ ।
उनका अनुसार चलचित्रले राम्रो ‘माउथ प्बलिसिटी’ पाइरहेको कारण हलहरुमा अझै भिड लागि रहेको हो ।
एसएस राजामौली निर्देशित चलचित्र आरआरआर महँगो बलिउड फिल्ममध्येको एक हो ।
‘बाहुबली’ फेम निर्देशक राजामौली निर्देशित आरआरआर बनाउन चार सय करोड भारु खर्च गरिएको छ ।
दक्षिण भारतीय स्टारद्वय रामचरण र एनटिआरको मुख्य भूमिका रहेको फिल्ममा बलिउड अभिनेता अजय देवगण र अभिनेत्री आलिया भट्टले अभिनय गरेका छन् ।
फिल्ममा सन् १९२० को पुष्ठभूमिलाई देखाइएको छ ।
संसारभरबाट मिश्रित प्रतिक्रिया बटुलिरहेको चलचित्रमा ब्रिटिस शासनविरुद्ध लड्ने गाउँले विद्रोही र ब्रिटिस सिपाहीको कथालाई प्रस्तुत गरिएको छ ।
