विराटनगर । ग्रामीण नेपालको बदलिँदो सामाजिक परिवेश, वैदेशिक रोजगारीको प्रभाव र किसानले दैनिक भोगिरहेका समस्यालाई केन्द्रमा राखेर ‘फिल्म अस्त्र’ले निर्माण गरेको सर्ट फिल्म ‘कर्न बारी’ सार्वजनिक भएको छ। पूर्वी भित्री मधेशका वास्तविक परिवेश र घटनाबाट प्रेरित फिल्मको छायांकन सुनसरीको चतरा र चक्रघट्टी आसपासका क्षेत्रमा गरिएको हो।
फिल्मले रोजगारीका लागि युवाहरू विदेशिएपछि गाउँमा देखिएको जनशक्ति अभाव, खेतीपातीमा परेको असर तथा मकैबारीमा बाँदर र सुगाले पुर्याउने क्षतिबाट किसानले भोग्नुपरेको संघर्षलाई संवेदनशील ढंगले प्रस्तुत गरेको छ। विकासका आधारभूत सुविधा गाउँसम्म प्रभावकारी रूपमा नपुग्दा कृषिमा आश्रित परिवारले सामना गरिरहेका चुनौतीलाई पनि फिल्मले उजागर गरेको छ।
कृषकको पीडासँगै नयाँ पुस्ताको सोच, प्रेम, सम्बन्ध र विद्यार्थी जीवनका अनुभूतिलाई समेत कथामा समेटिएको छ। विशेषगरी मकैबालीमा हुने क्षतिलाई प्रेमकथासँग प्रतीकात्मक रूपमा जोडेर दर्शकलाई सामाजिक यथार्थबारे सोच्न बाध्य बनाउने प्रयास गरिएको निर्माण टिमले जनाएको छ।
फिल्मको लेखन चक्र ए. चेत र अनमोल क्षेत्री अधिकारीले गरेका हुन् भने निर्देशन चक्र ए. चेतको रहेको छ। फिल्मको निर्माता सृजन ओझा हुन्।
फिल्ममा अनमोल क्षेत्री अधिकारी, रस्मी उप्रेती, रमेशचन्द्र न्यौपाने, कौशल बुढाथोकी, सायोरी थापा र सुनिला थापा खड्काको अभिनय रहेको छ। अंकित काफ्ले मुख्य सहायक निर्देशक रहेका फिल्मको छायांकन तथा सम्पादन भुपाल सिंह देवानले गरेका छन्। ध्वनि डिजाइन चक्र ए. चेत र शालिग्राम रेग्मीको रहेको छ।
निर्माण टिमका अनुसार ‘अस्त्र’ मनोरञ्जनका लागि मात्र नभई गाउँ, किसान र समाजले भोगिरहेका यथार्थलाई दर्शकमाझ पुर्याउने उद्देश्यले निर्माण गरिएको हो।
