माथिल्लो क्रमका ब्याटरले उत्कृष्ट ब्याटिङ गरेपछि नेपालले पपुवा न्युगिनीलाई जितका लागि एक सय ८४ रनको लक्ष्य दिएको छ ।
पूरै २० ओभर खेलेको नेपालले नौ विकेट गुमाएर पिएनजीलाई मध्यम लक्ष्य दिएको हो ।
त्रिकोणात्मक टी२०आई सिरिजअन्तर्गतको पहिलो खेलमा टस हारेको नेपालले पहिले ब्याटिङको निम्तो पाएको थियो ।
कीर्तिपुरस्थित टीयू क्रिकेट रङ्गशालामा सम्पन्न पहिलो इनिङमा नेपालले उत्कृष्ट ब्याटिङ गरेको हो ।
नेपालका लागि ओपनर आशिफ शेखले सर्वाधिक ४३ रन बनाए । उनीसँगै अर्का ओपनर कुशल भुर्तेलले २० रनको योगदान दिए ।
शेख र भुर्तेल बाहेक रोहित पौडेलले ३४, आरिफ शेखले ३१ र करण केसीले १४ रन बनाउँदा कुशल मल्लले ११, लोकेश बमले पाँच, दिपेन्द्रसिंह ऐरीले चार र सोमपाल कामीले एक रन जोडे ।
क्रिजमा अन्तिमसम्म रहेका कप्तान सन्दिप लामिछाने एक र अविनाश बोहरा शुन्य रनमा अविजित रहे ।
पिएनजीका लागि अलेइ नावे, चाड सोपर र चाल्र्स अमिनीले समान दुई विकेट लिए । नोर्मान भानुआ, रिले हेकुरे र एक–एक विकेट लिँदै नेपाललाई रोक्ने प्रयास गरे ।
माथिल्लो क्रमका ब्याटरले उत्कृष्ट प्रदर्शन गरे पनि मध्यम र तल्लो क्रमका ब्याटरले गतिलो प्रदर्शन गर्न नसक्दाँ नेपाल अझै ठूलो स्कोर बनाउनबाट रोकियो ।
आज पहिलो खेल खेल्ने नेपालले दोस्रो खेलमा बुधबार मलेसियाविरुद्ध खेल्नेछ ।
