कैलालीको धनगढीमा जारी ‘मुख्यमन्त्री कप राष्ट्रिय पुरुष भलिबल प्रतियोगिता’ मा विभागिय टोली नेपाल पुलिस क्लब र त्रिभुवन आर्मी सेमिफाइनलमा पुगेका छन् ।
बुधबार भएको पहिलो खेलमा आर्मीले प्रदेश १ लाई ३–० को सोझो सेटमा हरायो ।
प्रदेश १ लाई पहिलाे सेटमा २५–१७ ले हराएकाे आर्मीले दाेस्राे सेट २५–२१ र तेस्राे तथा अन्तिम सेट २५–९ ले आफ्नाे पक्षमा पार्दै सहज जित दर्ता गर्याे ।
आर्मी र प्रदेश १ काे खेलकाे ‘म्यान अफ दि म्याच’ आर्मीका दुर्गा खड्का चुनिए ।
आजै भएकाे दोस्रो खेलमा अर्काे विभागिय टाेली नेपाल पुलिस क्लबले जित दर्ता गर्दै सेमिफाइनलमा आफ्नाे स्थान पक्का गर्याे ।
पुलिसले कर्णाली प्रदेशलाई ३–० को सोझो सेटले स्तब्ध बनायो ।
पहिलाे र दाेस्राे सेटमा नचले पनि तेस्राे सेटमा भने कर्णालीले पुलिसविरुद्ध दबाब सिर्जान गरे पनि खेल सुम्पिन बाध्य बन्याे ।
कर्णालीविरुद्ध निकै उत्कृष्ट प्रदर्शन गरेकाे पुलिसले पहिलाे सेटमा २५–८ काे जित दर्ता गर्याे । त्यस्तै, २५–९ ले दाेस्राे सेट जितेकाे पुलिसले अन्तिम सेटमा २५–१५ को जित निकाल्न सफल भयाे ।
पुलिस र कर्णालीबीच भएकाे खेलकाे ‘म्यान अफ दि म्याच’ पुलिस क्लबका हिम राना घाेषित भए ।
आजै भएकाे तेस्राे खेलमा बागमती प्रदेशलाई ३–१ को सेटले हराउँदै सुदूरपश्चिमले प्रतियाेगिताकाे क्वार्टरफाइनलमा स्थान बनाएको छ ।
सुदूरपश्चिमले २५–१६, २५–२३, १६–२५, २५–२२ को जित निकालेको हो ।
तेस्राे खेलका ‘म्यान अफ दि म्याच’ सुदूरपश्चिमका सन्तोष महता भए ।
चैत १२ गतेसम्म सञ्चालन हुने प्रतियोगिताको विजेताले चार लाख, उपविजेताले दुई लाख, तेस्रो हुने टोलीले एक लाख र चौथो हुनेले ५० हजार रुपैयाँ पुरस्कार प्राप्त गर्नेछन् ।
प्रतियोगिताको सर्वोत्कृष्ट खेलाडीलाई २० हजार अन्य उत्कृष्ट विधाका खेलाडी तथा प्रशिक्षकलाई जनही १० हजार रुपियाँ प्रदान गरिने आयोजकले जनाएको छ ।
