रियल मड्रिडका फ्रान्सेली स्टार फरवार्ड करिम बेन्जेमाले आउँदो साेमबार हुने एल क्लासिकाे गुमाउने भएका छन् ।
रियल मड्रिडकाे घरेलु मैदान सान्टियागाे बर्नाबेउमा हुने एल क्लासिकाेकाे तयारीमा अन्य खेलाडीले प्रशिक्षण गरेपनि बेन्जेमा प्रशिक्षणमा सहभागी भएनन् ।
गत मङ्गलबार स्पेनिस ला लिगाअन्तगर्त रियल मालाेर्काविरुद्धकाे खेलकाे ८६औं मिनेटमा बेन्जेमाले चाेट बाेक्दै मैदान छाडेका थिए ।
उक्त खेलमा रियल ३–० गाेलान्तरले विजयी भएकाे थियाे । रियलले गरेकाे तीनै गाेलमा बेन्जेमा सामेल भएका थिए ।
भिनिसियस जुनियरकाे गाेलमा एसिस्ट गरेका बेन्जेमाले त्यसपछि दुई गाेल गर्दै खेलमा जित सुनिश्चित गरेका थिए ।
खेलकाे अन्त्यपछि प्रतिक्रिया दिएका बेन्जेमाले आफ्ना चाेट खासै ठूलाे नभएकाे बताएका थिए ।
शुक्रबार गरिएका परीक्षणहरूका नतिजा सकारात्मक देखिएपनि आज भएकाे प्रशिक्षणमा बेन्जेमा सहभागी नहुनुले उनी पूर्ण रूपमा फिट छैनन् भन्ने पुष्ठि गर्छ ।
बेन्जेमा खेल्न फिट नहुने भएपछि रियलका प्रशिक्षक कार्लो एन्सेलोट्टीमाथि एल क्लासिकाेलाई दबाब बढेकाे छ ।
किनकी जारी सिजन रियलका मुख्य हतियारका रूपमा फ्रान्सेली स्टार बेन्जेमा प्रयाेग भइरहेका छन् र उनले उस्तै चुस्त प्रदर्शन समेत गरिरहेका छन् ,
आफ्नो खेल करिअरकै उत्कृष्ट फर्ममा रहेकाे मानिएका बेन्जेमा जारी ला लिगाकाे उच्च गाेलकर्ता हुन् ।
लिगकै उच्च एसिस्ट प्रदान गर्ने खेलाडी समेत रहेका बेन्जेमाले २२ गाेल र ११ एसिस्ट गरिसकेका छन् ।
लिगकाे २८औं चरणका खेल सकिँदा ६६ अङ्कका साथ रियल शीर्ष स्थानमा रहँदा एक खेल कम खेलेकाे (२७ खेल) बार्सिलाेना ५१ अङ्कका साथ तेस्राे स्थानमा छ ।
उत्कृष्ट फर्ममा रहेका यी दुई क्लबबीचकाे एल क्लासिकाे निकै राेचक हुने अनुमान गरिएकाे छ ।
ला लिगका पछिल्ला पाँच खेलमा समान नतिजा आत्मसाथ गरेका यी दुवै टाेलीले चार जित र एक बराबरी खेलेका छन् ।
