युइएफए युरोपा लिगअन्तर्गत स्पेनिस क्लब बार्सिलोना टर्कीको गालातासारेसँग बराबरीमा रोकिएको छ ।
बिहीबार राति क्याम्प नोउमा भएकाे अन्तिम १६ को पहिलो लेगमा बार्सिलोना गालातासरेसँग गोलरहित बराबरीमा रोकिएको हो ।
स्पेनिस क्लब बार्सिलोनाले टर्की क्लबविरुद्ध बल पकडमा सफल भए पनि फिनिसिङमा चुकेको हो ।
बार्सिलोनाको घरेलु मैदानमा भएको खेलमा दुबै टोलीले पाएको अवसरलाई सदुपयोग गर्न सकेनन् । जसको कारण खेल बराबरीमा सकियो ।
बार्सिलोना र गलातासारेबीचको दोस्रो लेग अर्को साता हुनेछ । दोस्रो लेग गलातासारेको मैदानमा हुनेछ ।
युरोपा लिगअन्तर्गत गएराति नै भएको अर्को खेलमा स्पेनिस क्लब सेभिल्लाले इङ्ग्लिस क्लब वेस्ट ह्यामलाई १-० गोलले हरायो ।
सेभिल्लाको मैदानमा घरेलु टिमलाई जिताउन मुनिर एल हडाडीले निर्णायक गोल गरे । पहिलो हाफ गोलरहित बराबरीमा सकिएको उक्त खेलको ६०औँ मिनेटमा हडाडीले गोल गर्दै सेभिल्लालाई जिताए ।
जितसँगै पहिलो लेगमा सेभिल्लाले अग्रता बनाएको छ ।
अब, १७ मार्चमा हुने दोस्रो लेगमा सेभिल्लालाई अन्तिम आठमा प्रवेश गर्न बराबरी नै काफी हुने छ ।
युरोपा लिगअन्तर्गत नै पहिलो लेगमा फ्रेन्च क्लब मोनाको पराजित भएको छ । मोनाकोलाई ३ ब्रागाले २-० ले हराएको हो ।
ब्रागाको जितमा एभेल रुइज र भिक्टर म्यानुअलले एक-एक गोल लगाए ।
यस्तै, इटालियन क्लब अटलान्टाले जर्मनको लिभरकुजेनमाथि ३-२ गोलान्तरको जित निकालेको छ ।
रोमाञ्चक खेलमा अटलान्टाका लागि लुइज फर्नान्डो मुरियल फ्रुटोले दुई तथा रुस्लान मालिनोभोस्कीले एक गाेल गरे ।
लिभरकुजेनका चार्ल्स एरेन्जगुइज र माैसा डाइबीले एक-एक गोल फर्काए ।
अर्को खेलमा रेन्जर्सले क्रिभेना ज्भेज्दालाई ३-० गोलले हराउँदै पहिलो लेगमा अग्रता बनाएको छ ।
रेन्जसर्को जितमा जेम्स टाभेर्नियर, अल्फ्रेडो मोरेलस र लियोन बालेगनले एक गोल गरे ।
पहिलो लेगअन्तर्गत बिहीबार रातिका लागि तय भएको आरबी लेइपजिग र स्पार्टक मस्कोबीचको खेल भने स्थगित भयो ।
