नाबालिग गायिकामाथि जबर्जस्ती करणी गरेको आरोप लागेका कलाकार पल शाह थप १२ दिन थुनामा बस्नुपर्ने भएको छ ।
जिल्ला प्रहरी कार्यालय तनहुँमा फागुन १५ गते आत्मसमर्पण गरेका शाहलाई थप १२ दिन हिरासतमा राखेर अनुसन्धान गर्न जिल्ला अदालत तनहुँले अनुमति दिएसँगै शाहको थुना बसाइ लम्बिने भएको हो ।
आफूलाई माया गर्छु, विवाह गर्छु भनी फकाएर पटक–पटक करणी गरेको जाहेरी नाबालिग गायिकाले तनहुँ प्रहरीमा दर्ता गरेसँगै प्रहरीले शाहको खोजी कार्य तीव्र बनाएको थियो ।
प्रहरीले पललाई फेला पार्न नसकेपछि उनी भागेको हल्ला चलेको थियो ।
तर आफू पारिवारीक र खराब स्वास्थ्यको कारण प्रहरीसामु उपस्थित हुन नसकेको सन्देश सामाजिक सञ्जालमा अपलोड गरेर शाह आफैं तनहुँ प्रहरीसमक्ष उपस्थित भएका थिए ।
१७ वर्षीय गायिका र कलाकार शाहको भेट एक गीतको भिडियो सुटिङको क्रममा भएको जाहेरीमा उल्लेख गरिएको छ । त्यसपछि पीडित गायिकासँग नजिकिएका शाहले विभिन्न बहानामा पटक–पटक बलात्कार गरेको भनिएको छ ।
पीडित गायिकाको परिवारका अनुसार तीन महिनायता गायिका एकोहोरिएकी थिइन् ।
गीत–सङ्गीतमा ध्यान दिन नसकेपछि बुझ्दा शाहसँगको घटना बाहिर आएको र त्यसपछि कानुनी उपचारमा परिवार लागेको हो ।
शाहविरुद्ध उजुरी परेपछि सार्वजनिक भएका केही अडियोलाई प्रमाणका रुपमा पेश गर्दै यतिबेला शाहका समर्थकले उनलाई फसाइएको भन्दै तनहुँ प्रहरी र्कायालयअघि प्रदर्शन गर्दै आइरेका छन् ।
शाह निर्दोष रहेको बताउँदै उनका समर्थकले सामाजिक सञ्जालमा ‘ह्यासट्याग जस्टिस फर पल शाह’ अभियान नै चलाइरहेका छन् ।
तर विषय प्रहरी र न्यायालयमा पुगिसकेको भन्दै अबको सबै निर्णय न्यायालयलाई गर्न दिनुपर्ने तर्क जानकारहरुले राख्दै आएका छन् ।
