झम्सीखेल युथ क्लबसँग १–१ गोलको बराबरी खेल्दै सरस्वती युथ क्लब जारी सहिद स्मारक ‘बी’ डिभिजन लिग अङ्क तालिकाको शीर्ष स्थानमा उक्लिएको छ ।
आज भएकाे दिनको दोस्रो खेलमा सरस्वतीले सुरुवाती अग्रता लिए पनि अङ्क बाँड्न बाध्य बन्याे ।
खेलकाे पहिलो हाफकाे २२औं मिनेटमा सञ्जीव लामाले गोल गरेपछि सरस्वतीले अग्रता लिएकाे थियाे तर पहिलाे हाफ अघिकाे अतिरिक्त समयमा तीर्थबहादुरले गोल गर्दै झम्सीखेललाई बराबरीमा ल्याएका थिए ।
दोस्रो हाफमा कुनै टाेलीले पनि गोल गर्न सकेनन् र दुबै टोली एक–एक अङ्क बाँड्न बाध्य बने ।
आज भएको पहिलो खेलमा मध्यपुर युथ एसाेसिएसनले नव प्रवेशी सामाजिक युथ क्लबमाथि ५–२ गोलान्तरकाे सानदार जित दर्ता गरेकाे छ ।
मध्यपुरका लागि चौथो मिनेटमा सन्नी लामाले गोल गर्दै खाता खाेलेका थिए । त्यसकाे चार मिनेटपछि अर्थात खेलको ८ औं मिनेटमा सञ्जीव थापाले गोल गर्दै मध्यपुरकाे अग्रता दोब्बर बनाए ।
तर त्यसपछि सन्तुलित खेल प्रदर्शन गरेकाे सामाजिकले पाँच मिनेटमा दुई गोल गर्दै खेलमा फर्किने लक्षण देखायो ।
सामाजिकका लागि विकास दर्जीले १६ औं मिनेटमा गोल गरे भने खेलको २१ औं मिनेटमा वसन्तबहादुर रानाले गोल गर्दै खेलमा २–२ गाेलकाे बराबरी गर्न सफल भए ।
तर पहिलो हाफको थपिएको अतिरिक्त समयमा सञ्जीबले व्यक्तिगत दाेस्राे र टाेलीकाे तेस्राे गाेल गर्दै सामाजिकविरुद्ध मध्यपुरलाई पुनः अग्रता दिलाए ।
दोस्रो हाफमा मध्यपुरले सामाजिककाे पाेस्टमा थप दुई गाेल गर्याे र स्पष्ट तीन अङ्क हात पार्याे ।
मध्यपुरका लागि ५४औं मिनेटमा धिरज श्रेष्ठले चौथो र ७४औँ मिनेटमा जेनिस प्रजापतिले पाँचौं गोल गर्दै टाेली जित सुनिश्चित गरे ।
जितसँगै मध्यपुरले तेस्रो स्थान हासिल गरेको छ भने सामाजिक क्लबले १३ औं स्थानमा रहेर लिग सुरु गरेको छ ।
दुई खेलबाट चार अङ्क बटुलेकाे सरस्वती बी डिभिजन अङ्क तालिकाकाे शीर्ष स्थानमा छ ।
सरस्वतीसँग बराबरी खेलेकाे झम्सीखेल भने एक अङ्कका साथ तालिकाकाे नवाैं स्थानमा रहेकाे छ ।
लिगमा भोलि (शनिबार) तीन खेल हुनेछन् ।
पहिलाे खेलमा श्री भगवती क्लबले ब्वाइज युनियन क्लबसँग खेल्नेछ भने दोस्रो खेल बाँसबारी क्लब र टुसाल युथ क्लबबीच हुनेछ ।
तेस्रो खेलमा वीरगन्ज युनाइटेडले नयाँबस्ती युथ क्लबसँग प्रतिस्पर्धा गर्नेछ ।
तीनवटै खेल एन्फा कम्प्लेक्सकाे मैदानमा हुनेछ ।
