इटालियन क्लब नापोलीमाथि सानदार जित निकाल्दै स्पेनिस महारथी क्लब बार्सिलोना युरोपा लिग फुटबलको अन्तिम १६ मा प्रवेश गरेको छ ।
बिहीबार राति भएको अन्तिम ३२ को दोस्रो लेगको खेलमा नापोलीमाथि ४-२ गोलको जित निकाल्दै बार्सिलोना प्रि-क्वार्टफाइनलमा प्रवेश गरेको हो ।
यसअघि बार्सिलोनाको मैदान क्याप नोउमा भएको पहिलो लेगको खेल १-१ गोलको बराबरीमा सकिएको थियो ।
तर दोस्रो लेगको खेलमा सिरी ए क्लब नापोलीमाथि सानदार जित निकाल्दै समग्रमा ५–३ को जितसहित अघिल्लो चरणमा स्थान पक्का गरेको हो ।
गएराति नापोलीको मैदानमा बार्सिलोनालाई जिताउन जोर्डी अल्बा, फ्रेन्की डी जोङ, जेरार्ड पिके र पिएरिक–इम्रिक अबमेयाङले एक–एक गोल गरे ।
नापोलीका लोरेन्जो इसाइने र माटेओ पोलिटानोले एक–एक गोल गरे ।
खेलको सुरुवातमा जोर्डी अल्बा र फ्रेन्की डी जोङको गोलमा बार्सिलोनाले अग्रता बनाएको थियो ।
लोरेन्जो इन्साइनले पेनाल्टीमा गोल गर्दै नापोलीको आशा बढाएका थिए ।
तर जेरार्ड पिके र पियरिक इम्रिक अबमियाङले गोल गर्दै बार्सिलोनालाई सानदार जिततर्फ अघि बढाए ।
माटेओ पोलिटानोले नापोलीका लागि अन्तिम एक गोल गरे ।
प्राप्त जितसँगै बार्सिलोना युरोपा लिग उपाधिको बलियो दाबेदार देखिएको छ ।
जाभीले रोनाल्ड कोम्यानलाई प्रतिस्थान गरेसँगै बार्सिलोनाको नतिजासमेत राम्रो देखिएको छ ।
बार्सिलोनाले १८ वर्षपछि पहिलो पटक युरोपा लिग खेलिरहेको छ ।
च्याम्पियन्स लिगको समूह चरणबाटै आउट भएको बार्सिलोनाले यस सिजन युरोपा लिग खेलेको हो ।
पछिल्लोपटक बार्सिलोनाले सन् २००३/००४ मा युरोपा लिग खेलेको थियो ।
त्यसयता उसले युरोपकै ठुलो क्लब फुटबल प्रतियोगिता च्याम्पियन्स लिग खेल्दै आएको थियो ।
तर जारी सिजनको च्याम्पियन्स लिगको समूह चरणबाटै बाहिरिएपछि जाभी नेतृत्वको बार्सिलोनाले युरोपा लिग खेलिरहेकाे छ ।
डर्टमुन्ड बाहिरियो :
युरोपा लिगअन्तर्गत गएराति नै भएको अर्को खेलमा बराबरी खेले पनि जर्मन क्लब बोरुसिया डर्टमुन्ड बाहिरिएको छ ।
रेन्जर्ससँग २–२ गोलको बराबरी खेले पनि समग्रमा ६–४ को हारसहित डर्टमुन्ड बाहिरिएको हो ।
पहिलो लेगमा डर्टमुन्ड घरेलु मैदानमा ४–२ गोलले पराजित भएको थियो ।
गएराति रेन्जर्सको मैदानमा बराबरी खेल्दा डर्टमुन्डका लागि जुडे बेलिङ्घम र डोनिएल मलेनले एक–एक गोल गरे ।
रेन्जर्सका जेम्स टेभर्निएरले दुई गोल गरे ।
यससँगै रेन्जर्सले अन्तिम १६ मा स्थान बनायो भने डर्टमुन्ड अन्तिम ३२ बाटै बाहिरियो ।
