म्यानचेस्टर युनाइटेडले निर्धारित समय सकिन १० मिनेट बाँकी रहेको अवस्थामा गोल गर्दै युरोपियन च्याम्पियन्स लिगमा इङ्ग्लिस क्लब स्पेनिस क्लब एथ्लेटिको मड्रिडसँग बराबरी खेलेको छ ।
बुधबार राति भएको च्याम्पियन्स लिगको अन्तिम १६ अन्तर्गत पहिलो लेगको खेलमा म्यानचेस्टर युनाइटेडले एथ्लेटिकोलालाई उसैको घरमा १–१ गोलको बराबरीमा रोकेको हो ।
अब यी दुई टिमको दोस्रो लेगको खेलमा १५ मार्चमा युनाइटेडको मैदान ओल्ड ट्राफोर्डमा हुने छ ।
दुवै लेगमा जित निकाल्ने टिम अन्तिम आठमा प्रवेश गर्ने छ ।
गएराति वान्डा मेट्रोपोलिटानोमा एथ्लेटिकोका लागि जाओ फेलिक्सले एक गोल गरे भने युनाइटेडका एन्थोनी इलाङ्गाले गोल फर्काए ।
घरेलु टिम एथ्लेटिकोले खेलको सातौँ मिनेटमा फेलिक्सको गोलमा सुरुआती अग्रता बनाएको थियो ।
खेलको ८०औँ मिनेटमा म्यानचेस्टर युनाइटेडका इलाङ्गाले गोल गरेपछि खेल बराबरीमा सकियो ।
यस खेल अवधिभरि मैदानमै रहे पनि पोर्चुगिज स्ट्राइकर क्रिस्टियानो रोनाल्डोले गोल गर्न सकेनन् ।
एथ्लेटिकोविरुद्धको उनको तथ्याङ्क उत्कृष्ट छ ।
रोनाल्डोले एथ्लेटिकोविरुद्ध ३६ खेल खेल्दा ३० गोलमा योगदान दिएका छन् ।
उनले एथ्लेटिकोविरुद्ध २५ गोल र पाँच असिस्ट गरेका छन् ।
रोनाल्डो सम्मेलित टोलीले एथ्लेटिकोलाई १६ पटक हराएको छ भने १० पटक बराबरी खेलेको छ ।
यस्तै, नौ खेलमा भने रोनाल्डोको टिमले हार बेहोरेको छ ।
अनि रोनाल्डो रियल मड्रिडले सन् २०१४ र २०१६ गरी दुई पटक च्याम्पियन्स लिगको फाइनलमा पुगेर एथ्लेटिकोलाई हराउँदै उपाधि जितेको छ ।
सन् २०१० मा ला लिगाअन्तर्गत रियल मड्रिडले एथ्लेटिकोलाई २–० गोलले हराउँदा रोनाल्डोले पहिलो पटक एथ्लेटिकोविरुद्ध खेलेका थिए ।
त्यसयता उनले एथ्लेटिकोको पोस्टमा चार पटक ह्याट्रिक गोल गरिसकेका छन् ।
च्याम्पियन्स लिगअन्तर्गत गएराति नै भएको अर्को खेलमा डच क्लब आयाक्सले पोर्चुगलको बेन्फिकासँग २-२ गोलको बराबरी खेल्यो ।
आयाक्सका लागि डुसान टेडिक र सेबास्टिएन हलरले एक-एक गोल गरे भने बेन्फिकाका रोमन यारेन्चुकले एक गोल गरे ।
बेन्फिकाले एउटा आत्मघाती गोल भने उपहारमा पाएको थियो ।
गोलकर्ता हलरले नै आत्मघाती गोल गरेका थिए ।
अब, आयाक्स र बेन्फिकाबीचको दोस्रो लेगको खेल १५ मार्चमा हुने छ ।
दुवै खेलमा जित निकाल्ने टोलीले अन्तिम आठमा स्थान पक्का गर्ने छ ।
यो पनि :
च्याम्पियन्स लिग : चेल्सीको सहज जित, बराबरीमा रोकियो युभेन्टस
