आईसिसी टी२० विश्वकप ग्लोबल छनोटअन्तर्गत समूह चरणको अन्तिम खेलमा आज नेपालले क्यानडासँग प्रतिस्पर्धा गर्दै छ ।
ओमानस्थित अल अरेत रङ्गशालामा हुने खेलमा दुवै टोली जित निकाल्न चाहन्छ ।
नेपाली समय अनुसार दिउँसो ३ः४५ बजे सुरु हुने खेलमा नेपाल क्यानडालाई पाखा लगाउँदै समूह विजेताका रुपमा सेमिफाइनलमा स्थान पक्का गर्न चाहन्छ ।
यसअघि नेपालले खेलेका दुवै खेलमा नेपालले जित दर्ता गरेको छ ।
ग्लोबल क्वालिफायर अन्तर्गत समूह ‘ए’ को उपसमूह ‘बी’ मा रहेको नेपाल सर्वाधिक चार अङ्कसहित तालिकाको शीर्ष स्थानमा छ ।
फेब्रुअरी १८ मा भएको पहिलो खेलमा नेपालले बलियो राष्ट्र ओमानलाई ३९ रनले पाखा लगाउँदै विजयी सुरुवात गरेको थियो ।
त्यस्तै, फिलिपिन्सविरुद्ध एक सय ३६ रनको जित दर्ता गरेर हौसिएको नेपाल लगातार तेस्रो जित दर्ता गर्न चाहन्छ ।
तर नेपालले क्यानडाविरुद्ध जित निकाल्न त्यति सहज भने हुने छैन ।
आफ्नो पहिलो खेलमा फिलिपिन्सलाई एक सय १८ रनले पराजित गर्दै विश्वकप ग्लोबल क्वालिफायरको सुखद सुरुवात गरेको क्यानडा नेपालको टाउको दुखाइ बन्न सक्छ ।
दोस्रो खेलमा आयोजक ओमानसँग नौ विकेटको भारी अन्तरको हार बेहोरेको क्यानडाले सेमिफाइनलमा स्थान बनाउन नेपाललाई विशाल अन्तरले हराउन आवश्यक छ ।
दुई अङ्कसहित अङ्कतालिकाको दोस्रो स्थानमा रहे पनि समान अङ्कसहित तेस्रो स्थानमा रहेको ओमानको कमजोर मानिएको फिलिपिन्ससँग खेल्न लागेकाले क्यानडा अझ दबाबमा हुनेछ ।
समूहको शीर्ष स्थानमा रहेको नेपाल ४.३७५ नेट रनसहित नेट रन रेटमा पनि निकै अघि छ । त्यसैले आजको खेलमा सामान्य अन्तरले पराजित भएपनि नेपालको सेमिफाइनल यात्रा लगभग निश्चित छ ।
यहीँ वर्ष अस्ट्रेलियामा अक्टोबर १६ देखि नोभेम्बर १३ सम्म आयोजना हुने टी२० विश्वकपमा स्थान बनाउन हाल भइरहेको ग्लोबल क्वालिफायरको नेपाल कम्तिमा फाइनल पुग्नु पर्नेछ ।
आजको खेलसँगै ग्लोबल क्वालिफायरको समूह ‘ए’ को सेमिफाइनल समीकरण पूरा हुँदैछन् ।
सेमिफाइनल पुग्ने चार राष्ट्रमध्ये बाट नेपालले फाइनलमा स्थान बनाउन सके नेपालको टी२० विश्वकप यात्रा पक्का हुनेछ ।
