नेपाली राष्ट्रिय क्रिकेट टोलीका तीव्र गतिका बलर करण केसीले आइसिसी टी-२० विश्वकप ग्लोबल क्वालिफायर गुमाउने भएका छन् ।
छनोटका लागि ओमान पुगेको १७ सदस्यीय नेपाली टोलीका साथमा प्रतियोगिता स्थल पुगे पनि चोटग्रस्त रहेका केसीले खेल गुमाउने भएका हुन् ।
नेपाल क्रिकेट सङ्घ (क्यान) ले चोटको कारण अलराउण्डर करणले विश्वकप छनोट गुमाउने जनाएको छ ।
छनोटका लागि खेल्ने टोलीमा उनी अटाएका छैनन् ।
उनको स्थानमा फास्ट बलर गुलशन झा ओमान जाने छन् ।
ढाडमा समस्या देखिएका कारण अनफिट रहेका उनले ओमानमा चार राष्ट्र सम्मिलित टी२० सिरिजका नेपालले खेलेका तीनै खेल खेलेनन् ।
फेब्रुअरी १८ देखि ओमानमा आईसिसी टी२० विश्वकप ग्लोबल क्वालिफायर ‘ए’ का खेल सुरु हुँदैछन् ।
करणले बोकेको चोटबारे क्यानले बुधबार जानकारी गराएको छ ।
नेपाली टोलीको फिजियो विक्रम न्यौपानेका अनुसार करणले एब्डोमिनल (करङ) मांसपेशीको चोट बोकेका छन् ।
तर उनको बलिङ गर्ने तर्फको मांसपेशीको चोट नरहेको न्यौपानेले जनाएका छन् ।
करणको चोटबारे दुई हप्तासम्म अनुगमन गरिने छ । त्यसपछि रिहाबको लागि प्रक्रिया अघि बढाइने छ ।
टोलीमा भरपर्दा अर्का तीव्र गतिका बलर सोमपाल कामी समेत नहुँदा नेपाललाई बलिङमा समस्या देखिने भएको छ ।
चोटका कारण कामी र केसी टिमबाट आउट भएपछि नेपाली टोलीमा अब जितेन्द्र मुखिया, अविनाश बोहरा र कमलसिंह ऐरीमा गरी तीन तीव्र गतिका बलर मात्र रहेका छन् ।
नेदरल्यान्ड्सविरुद्ध खेल्दै सन् २०१५ मा नेपाली टोलीबाट टी२० मा डेब्यू गरेका ३० वर्षीय केसी ‘हार्ड हिटर’का रुपमा परिचित छन् ।
टी-२० आईका ३३ खेलमा ४४ विकेट लिएका केसीले नेपालका लागि दुई सय २८ रन बनाएका छन् ।
लोअर अर्डरमा आएर खेल जिताउन सक्ने क्षमता राख्ने केसी टोलीमा नहुँदा नेपाललाई समस्या पर्ने निश्चित छ ।
तर उनको स्थानमा युवा खेलाडी गुल्शन झालाई ओमान पठाउने तयारी नेपाल क्रिकेट सङ्घ (क्यान)ले गरिरहेको छ ।
दायाँ हाते बलर र बाँया हाते ब्याटर झाले भने नेपालका लागि टी२० आईमा डेब्यू गर्न बाँकी छ ।
१५ वर्षीय झाले गत सेप्टेम्बरमा ओमानमा सम्पन्न आईसीसी क्रिकेट विश्वकप लिग–२ अन्तर्गत त्रिकोणात्मक सिरिजका क्रममा अमेरिकाविरुद्ध डेब्यू गरेका थिए ।
ओमान, क्यानडा र फिलिपिन्ससँगै समूह ‘ए’ मा रहेको नेपालको क्वालिफायर खेल्ने अन्तिम टोलीको घोषणा आज गरिँदैछ ।
