युरोपियन च्याम्पियन्स लिग फुटबल प्रतियोगितामा फ्रेन्च क्लब पेरिस सेन्ट जर्मेन (पिएसजी)ले सर्वाधिक सफल क्लब रियल मड्रिडलाई हराएको छ ।
मङ्गलबार राति भएको च्याम्पियन्स लिगको अन्तिम १६ को पहिलो लेगमा पिएसजीले स्पेनको रियललाई १–० गोलले हराएको हो ।
फ्रान्सस्थित पर्स डेस प्रिन्समा पिएसजीलाई जिताउन किलियन एम्बाप्पेले एकमात्र गोल गरे ।
खेलको पहिलो हाफ र निर्धारित समय गोलरहित बराबरीमा सकिएको थियो ।
खेलको ६२औँ मिनेटमा पिएसजीले पेनाल्टीको माैका पाएको थियो ।
तर लियोनल मेस्सी पेनाल्टीमा चुक्दा उसले सुरुवाती अग्रता बनाउने अवसर खेर फालेको थियो ।
तर खेलको इन्ज्युरी समयमा एम्बाप्पेले गरेको गोल नै पिएसजीको जितमा निर्णायक बन्यो ।
उनले नेयमारको पासमा गोल गरेका थिए ।
चोटका कारण लामो समय मैदानबाहिर रहेका नेयमार यसै खेलबाट मैदान फर्किएका हुन् ।
जितसँगै पिएसजीले पहिलो लेगमा अग्रता बनायो ।
अब दोस्रो लेगको खेल ९ मार्चमा रियलको घरेलु मैदानमा हुनेछ ।
रियल च्याम्पियन्स लिगमा सर्वाधिक धेरै अनुभवी टिम हो ।
उसले हालसम्म १३ वटा उपाधि जितेको छ ।
पिएसजी भने अहिलेसम्म उपाधि जित्न सकेको छैन ।
२०१९–२० को सिजनमा फाइनलमा बायर्न म्युनिखसँग हारेसँगै पिएसजीले उपाधि जित्न सकेन ।
यस्तै, गए राति नै भएको अर्को खेलमा साविक उपविजेता म्यानचेस्टर सिटीले पोर्चुगलको स्पोर्टिङ सिपीमाथि फराकिलो जित निकाल्यो ।
पोर्चुगलको लिस्बनमा भएको खेलमा सिटीले सिपीमाथि ५–० गोलान्तरको फराकिलो जित निकालेको हो ।
सिटीलाई जिताउन बर्नान्डो सिल्भाले दुई गोल गरे भने रियाद महरेज, फिल फोडेन र रहिम स्टर्लिङले एक–एक गोल गरे ।
खेलको सातौँ मिनेटमा महरेजले गोल गर्दै सिटीलाई सुरुआती अग्रता दिलाए ।
१७औँ मिनेटमा सिल्भाले गोल गरेपछि सिटीले आफ्नो अग्रता दोब्बर बनायो ।
३२औँ मिनेटमा फिल फोडेनले गोल गर्दै सिटीलाई ३–० गोलले अगाडि बढाए ।
४४औँ मिनेटमा सिल्भाले व्यक्तिगत दोस्रो गोल गर्दै पहिलो हाफभरि सिटीलाई ४–० गोलको अग्रता दिलाए ।
५८औँ मिनेटमा स्टर्लिङले गोल गरेपछि सिटीले एकोहोरो जित दर्ता गरेको हो ।
जितसँगै सिटीले पहिलो लेगमा अग्रता बनाएको छ ।
अब दोस्रो लेगको खेल ९ मार्चमै सिटीको मैदानमा हुने छ ।
