दिपेन्द्र सिंह ऐरीले अविजित अर्धशतकीय रन बनाएपछि नेपालले शुक्रबार घरेलु टिम ओमानलाई पराजित गरेको छ ।
चारदेशीय अन्तर्राष्ट्रिय टि-२० शृङ्खलाको पहिलो खेलमा शुक्रबार नेपालले ओमानलाई ६ विकेटले हराएको हो ।
ओमानको अल अमिरात क्रिकेट मैदानमा घरेलु टिम ओमानले पहिले ब्याटिङ गरी निर्धारित २० ओभरमा ६ विकेटको क्षतिमा एक सय ३५ रनमात्र बनाएको थियो ।
नेपालले १९ दशमलव ३ ओभरमा चार विकेटको क्षतिमा एक सय ३७ रन बनायो ।
दिपेन्द्रले ५३ बलमा अविजित ७३ रन बनाए ।
उनले आठ चौका र एक छक्का प्रहार गरे ।
दिपेन्द्र म्यान अफ दि म्याच पनि बने ।
यस्तै, आरिफ शेखले २५ रन बनाए ।
आरिफले २० बलमा तीन चाैका प्रहार गरे ।
आसिफ शेखले ११ बलमा दुई चौका प्रहार गर्दै १४ रन बनाए भने पूर्वकप्तान ज्ञानेन्द्र मल्लले १६६ बलमा १३ रन जोडे ।
यस्तै, प्रदीप ऐरीले १४ बलमा चार रन जोडे ।
बलिङतर्फ ओमानका कालिमुल्लाहले दुई तथा खबर अलीले एक विकेट लिए ।
त्यसअघि नेपालले टस जितेर पहिले फिल्डिङ रोजेपछि ब्याटिङमा उत्रिएको ओमानले निर्धारित २० ओभर खेल्दा ६ विकेटको क्षतिमा एक सय ३५ रन बनाएको थियो ।
ओमानका कप्तान जीशन मक्सुदले अजिवित रहँदै सर्वाधिक धेरै ४३ रन जोडे ।
उनले ४१ बल खेल्दा चार चौका र एक छक्का प्रहार गरे ।
यस्तै, मोहम्मद नदीमले ३१ रन जोडे ।
उनले ३० बल खेल्दा दुई चौका प्रहार गरे ।
यसैगरी जतिन्दर सिंहले तीन चौका प्रहार गर्दै आठ बलमा १३ रन जोडे भने कश्यप प्रजापति ११ रनमा आउट भए ।
शोयब खान र आयन खानले समान ११–११ रन बनाए भने खुरान नवाजले अजिवित ६ रन बनाए ।
नदीम खुसी शून्य रनमै आउट भए ।
बलिङतर्फ नेपालका अविनाश बोहोराले सर्वाधिक तीन विकेट हात पारे ।
चार ओभर बलिङ गरेका उनले २६ रनमात्र खर्चिए ।
यस्तै, कमल ऐरीले चार ओभर बलिङ गर्दा २५ रन खर्चिएर एक विकेट लिए भने आरिफ शेखले एक ओभर बलिङ गर्दा दुई रन खर्चिएर एक विकेट लिए ।
नेपालका कप्तान सन्दीप लामिछानेको नाममा एक विकेट रह्यो ।
उनले तीन ओभर बलिङ गर्दा रन खर्चिए ।
चार देश सम्मिलित सिरिजमा नेपालसहित ओमान, युएई र आयरल्यान्ड रहेका छन् ।
सिरिजमा नेपालले १३ तारिखमा युएई र १४ तारिखमा आयरल्यान्डसँग खेल्ने छ ।
नेपालले ओमानसँग टी–२० मा पछिल्लो पटक २०१९ मा खेलेको थियो ।
जसमा नेपाल ओमानसँग ६ विकेटले पराजित भएको थियो ।
फेब्रुअरी १८ देखि २४ तारिखसम्म आयोजना हुने आईसीसी टी–२० विश्वकप ग्लोबल छनोट खेलको तयारीका लागि नेपालले ओमानसँग खेलेको हो ।
यसै वर्ष अस्ट्रेलियामा आयोजना हुने विश्वकप छनोटका लागि नेपाल समूह ‘ए’ मा परेको छ ।
समूहमा नेपालसहित ओमान, बहराइन, क्यानडा, जमर्नी, आयरल्यान्ड, फिलिपिन्स र यूएई गरेर आठ टोली छन् ।
आठ टोलीलाई पनि दुई समूहमा विभाजन गरिएको छ ।
नेपालको समूहमा क्यानडा, ओमान र फिलिपिन्स छन् ।
अर्को समूहमा आयरल्यान्ड, युएई, बहराइन र जमर्नी छन् ।
नेपालले उद्घाटन खेलमा फेब्रुअरी १८ तारिख आयोजक ओमानसँग खेल्ने छ ।
यसैगरी, ग्लोबल छनोटका लागि समूह ‘बी’ मा जिम्बावे, हङकङ, जर्सी, नेदरल्यान्ड्स, पपुवा न्युगिनी, सिङ्गापुर, युगान्डा र अमेरिका छन् ।
समूह ‘बी’ को छनोट खेल भने जुलाई ११ देखि १७ सम्म जिम्बावेमा हुने छ ।
दुवै समूहका शीर्ष दुई टोलीले विश्वकपमा स्थान बनाउनेछन् ।