युरोपमा ब्राजिलबाट खेल्ने सर्वाधिक उत्कृष्ट खेलाडी ठहरिँदै स्ट्राइकर नेयमारले साम्बा गोल्ड अवार्ड-२०२१ हात पारेका छन् ।
साम्बा गोल्ड अवार्डलाई साम्बा डी‘ओर अवार्डका रूपमा पनि चिनिन्छ ।
फ्रान्सेली क्लब पेरिस सेन्ट जर्मेन (पिएसजी) का नेयमारले लगातार दोस्रो पटक सो अवार्ड जितेका हुन् ।
समग्रमा भने यो उनको पाँचाैँ साम्बा गोल्ड अवार्ड हो ।
यसअघि सन् २०१४, २०१५, २०१७ र २०२० को साम्बा गोल्ड अवार्ड जितेका थिए ।
खुट्टाका चोटका कारण गत नोभेम्बरदेखि मैदानबाहिरै रहेका नेयमारले अभ्यासमा फर्किएका छन् ।
दुई महिनायता चोटले थलिएर मैदानबाहिर रहँदै आएका नेयमार अघिल्लो बुधबारबाट प्रशिक्षणमा फर्किएका हुन् ।
गत २८ नोभेम्बरमा इटेन्नीसँगको खेलमा चोट बोकेका नेयमार त्यसयता मैदान फर्किएका छैनन् ।
तथापि, पिएसजीका मुख्य प्रशिक्षक मौरिसियो पोचेटिन्होले स्ट्राइकर नेयमार पूर्ण रूपमा निको भएको जनाएका थिए ।
अब, उनी रियल मड्रिडसँगको खेलबाट मेदान फर्किने सम्भावना छ ।
पिएसजीले च्याम्पियन्स लिगअन्तर्गत अन्तिम १६ को खेलमा रियलको सामना गर्ने छ ।
रियलसँगको पहिलो लेगको खेलमा उनी मैदान फर्किनेमा पोचेटिन्हो विश्वस्त छन् ।
पिएसजी र रियलको पहिलो लेगको खेल १५ फेब्रुअरीमा फ्रान्समा हुनेछ ।
