राष्ट्रिय महिला भलिबल टोलीमा रोजाईकी स्पाइकर सरस्वती चौधरी कम्तीमा ६ महिना कोर्ट बाहिर रहने भएकी छन् ।
बङ्गलादेशमा हालै सम्पन्न एभिसी सेन्ट्रल जोन महिला भलिबल च्याम्पियनसिपको फाइनल खेलको क्रममा बायाँ घुँडामा चोट बोकेकी चौधरीको सोमबार घुँडाको शल्यक्रिया गरिएको छ ।
च्याम्पियनसिपमा नेपाल पहिलो भएको थियो । सरस्वतीको सशस्त्र प्रहरी बलको बलम्बुस्थित अस्पतालमा शल्यक्रिया गरिएको हो ।
उनी विभागीय टोली सशस्त्रकै खेलाडी हुन् । सरस्वतीको शल्यक्रियामा सामेल सर्जिकल अर्थोपेडिक विभागका डाक्टर शैलेन्द्र श्रेष्ठलगायतको चिकित्सक टोलीले सरस्वतीलाई खेलमा फर्कन ६ महिनाभन्दा बढी समय लाग्ने जानकारी दिए ।
बङ्गलादेशमा चोट बोकेर फर्किएपछि पनि सरस्वतीले पोखरामा पुस २६ देखि माघ १ गतेसम्म सञ्चालित टाइगर कप भलिबल खेलेकी थिइन् ।
एपिएफलाई टाइगर कप उपाधि दिलाउन मुख्य भूमिका निर्वाह गरेकी उनी प्रतियोगिताकै सर्वोत्कृष्ट खेलाडीसमेत भएकी थिइन् ।
नेपाली महिला राष्ट्रिय भलिबल टोलीले हात पारेको पछिल्ला ठुला अन्तर्राष्ट्रिय उपलब्धिहरूमा सरस्वतीको महत्त्वपूर्ण योगदान रहेको छ ।
