विभागीय टोली नेपाल एपिएफ क्लबले पोखरामा सम्पन्न २०औँ संस्करणको आहा रारा गोल्डकपको उपाधि जितेको छ ।
शनिबार भएको फाइनल खेलमा प्रतियोगिताकै सर्वाधिक सफल क्लब मनाङ मर्स्याङ्दीलाई पेनाल्टी सुटआउटमा हराउँदै एपिएफले उपाधि जितेको हो ।
पेनाल्टी सुटआउटमा मनाङलाई ५–४ ले पराजित गर्दै एपिएफ पहिलो पटक उपाधि जित्न सफल भएको हो ।
निर्धारित ९० मिनेटमा दुवै टोलीले रोमाञ्चक २–२ गोलको बराबरी खेलेपछि खेल अतिरिक्त समयतर्फ धकेलिएको थियो ।
निर्धारित समयमा एपिएफका युवराज खड्का र रवि थिङ गोल गर्न सफल हुँदा मनाङका दयानन्द सिंह र फ्रयाङ्कलिन कियेटे टल्ला गोल गर्न सफल भएका थिए ।
निर्धारित समयपछि खेलमा थपिएको ३० मिनेटको पहिलो हाफमा दुवै टोली गोल गर्न असफल रहे ।
त्यसपछि पेनाल्टी सुटआउटमा खेल धकेलियो, जसमा एपिएफले बाजी मारेको हो ।
