नेपालसँग दुईवटा मैत्रीपूर्ण फुटबल खेल्न अफ्रिकी टोली मोरिसस सोमबार काठमाडौँ आइपुगेको छ ।
नेपाल र मोरिससबीच माघ १५ र १८ गते त्रिपुरेश्वरस्थित दशरथ रङ्गशालामा मैत्रीपूर्ण खेल हुँदै छ ।
मोरिसस फिफा वरीयतामा नेपालभन्दा तीन स्थान तल छ ।
अफ्रिकी देश मोरिसस फिफा वरीयतामा एक सय ७२औँ स्थानमा छ ।
नेपाल भने एक सय ६९औँ स्थानमा छ ।
मोरिसससँगको खेलका लागि नेपाली राष्ट्रिय फुटबल टोली अहिले प्रशिक्षणमा ब्यस्त छ ।
मोरिसस भने तयारीका साथ नेपाल आएको हो । अब, उसले यहाँ पनि प्रशिक्षण गर्ने छ ।
मोरिसस नेपालका लागि आधिकारिक पहिलो अफ्रिकन प्रतिद्वन्द्वी हो ।
नेपालले आफ्नो फुटबल इतिहासमा पहिलो पटक औपचारिक मान्यताप्राप्त आधिकारिक खेलमा कुनै अफ्रिकी देशको सामना गर्न लागेको हो ।
यसअघि नेपालले अफ्रिकी राष्ट्रसँग फुटबल खेलेको थिएन ।
यसअघि नेपालले दुई पटक अफ्रिदी देशसँग खेलेको भएपनि ती दुवै खेल औपचारिक मान्यताप्राप्त भने थिएनन् ।
सन् १९८३ मा नेपालले मलेसियामा भएको मर्डेका कप खेलेको थियो, जसमा उसले अल्जेरिया ११ सँग खेलेको थियो ।
सो खेलमा नेपाल २–० गोलले पराजित भएको थियो ।
यस्तै, सन् २००८ को मर्डेका कपमै नेपालले सिरालियोन यु–२० सँग खेलेको थियो ।
जसमा नेपाल ३–१ ले पराजित भएको थियो ।
मोरिससले एक पटक अफ्रिका कप अफ नेसन्समा सहभागिता जनाइसकेको छ ।
सन् १९७४ मा उक्त प्रतियोगिता खेलेको माेरिससका लागि यो नै ठुलो उपलब्धि हो ।
यता, मोरिससको भने यो दोस्रो दक्षिण एसियाको भ्रमण हो ।
यसअघि उसले सन् २०१७ मा भारतको भ्रमण गरेको थियो, जसमा मोरिसस २-१ गोलले पराजित भएको थियो ।
अब, उसले नेपालविरुद्ध कस्तो प्रदर्शन गर्ला ? यो भने प्रतिक्षित विषय बनेको छ ।
नेपालले पछिल्लो पटक भारतविरुद्ध मैत्रीपूर्ण खेल खेलेयता अन्य खेल खेल्न पाएको छैन ।
गत सेप्टेम्बर २ मा नेपालले भारतसँग बराबरी खेलेको थियो ।
५ सेप्टेम्बरमा भएको भारतविरुद्धको दोस्रो खेलमा हार बेहोरेको थियो ।
त्यसअघि नेपाली टिमले साफ च्याम्पियनसिपको फाइनल खेल खेलेको थियो ।
अक्टोबर १६ मा भारतसँगको उक्त खेलमा नेपाल ३–० गोलले पराजित भएको थियो ।
नेपाल पहिलो पटक साफ च्याम्पियनसिपको फाइनलमा पुगेको थियो ।
