पोल्यान्डका स्ट्राइकर रोवर्ट लेवान्डोस्कीले २०२१ को उत्कृष्ट फिफा पुरुष वर्ष खेलाडीको अवार्ड जितेका छन् ।
सोमबार विशेष समारोहका बिच विश्व फुटबलको सर्वोच्च निकायले फिफाले जर्मन क्लब बायर्न म्युनिखका स्टार लेवान्डोस्कीलाई ‘फिफा द बेस्ट’ को अवार्ड प्रदान गरेको हो ।
लेवान्डोस्कीले लगातार दोस्रो पटक फिफा वर्ष खेलाडीको अवार्ड हात पारेका हुन् । यसअघि उनी सन् २०२० मा उत्कृष्ट ठहरिएका थिए ।
सो अवार्ड जित्नेक्रममा लेवान्डोस्कीले पेरिस सेन्ट जर्मेन (पिएसजी)का स्ट्राइकर लियोनल मेस्सी र लिभरपुलका मोहम्मद सालाहलाई उछिने ।
३३ वर्षीय लेवान्डोस्कीले गत वर्ष ६९ गोल गरेका थिए ।
उनले बुन्डेसलिगाअन्तर्गत एकै सिजनको लिगमा ३४ खेलमा ४३ गोल गरेका थिए ।
यस्तै, म्यान्चेस्टर युनाइटेडका क्रिस्टियानो रोनाल्डोलाई विशेष अवार्ड प्रदान गरिएको छ ।
रोनाल्डोलाई पुरुषतर्फ अहिलेसम्मकै सर्वाधिक गोलकर्ताको रूपमा सम्मान गरिएको हो ।
सर्वाधिक धेरै अन्तर्राष्ट्रिय गोल गर्दै विश्व कीर्तिमान राखेका कारण फिफाले ३६ वर्षीय रोनाल्डोलाई विशेष अवार्ड प्रदान गरेका हो ।
रोनाल्डोले गत वर्ष इरानी खेलाडी अली दाईको एक सय नौ गोलको कीर्तिमान भङ्ग गरेका थिए ।
रोनाल्डोले हालसम्म एक सय १५ अन्तर्राष्ट्रिय गोल गरिसकेका छन् ।
यसैगरी, सेभिल्लाका इरिक लामेलाले फिफा पुस्कास अवार्ड प्राप्त गरे भने चेल्सीका इडोआर्ड मेन्डीले उत्कृष्ट गोलरक्षकको अवार्ड हात पारे ।
डेनमार्डको पुरुष राष्ट्रिय फुटबल टोलीले फिफा फेयर प्ले अवार्ड जित्यो भने महिलातर्फ बार्सिलोनाकी अलेक्सिया पुटेलासले उत्कृष्ट फिफा महिला वर्ष खेलाडीको अवार्ड हात पारिन् ।
प्रशिक्षकमा चेल्सीका कोच थोमस टुचेल उत्कृष्ट बने ।
