स्पेनिस सुपर कपको फाइनलमा आज राती रियल मड्रिड र एथ्लेटिक क्लब भिड्दैछन ।
रियादस्थित किङ फहाद अन्तर्राष्ट्रिय रङ्गशालामा हुने फाइनल खेल राती १२ः१५ मा सुरु हुनेछ । बार्सिलोनालाई हराउँदै रियल फाइनलमा पुग्दा एथ्लेटिकले एट्लेटिको मड्रिडलाई पाखा लगाएको थियो ।
सिजनको पहिलो उपाधि जित्ने लक्ष्यका साथ मैदान उत्रदा दुवै टोली ६४ वर्षपछि फाइनलमा भिड्दै हुनेछन् । सन् १९५८ को कोपा डेल रेमा यी दुईबीच पछिल्लो पटक फाइनलमा भेट भएको थियो ।
सो खेलमा एथ्लेटिकले रियललाई २–० ले स्तब्ध बनाएको थियो । त्यसयता युरोपका थुप्रै प्रतियोगितामा यी दुईबीच भेट भएपनि फाइनलमा भने ६ दशकपछि एथ्लेटिक र रियल खेल्न लागेका हुन् ।
फाइनलअघि प्रि–म्याच कन्फरेन्समा सहभागी भएका दुवै टोलीका प्रशिक्षकले एकअर्कालाई जितकाे शुभकामना दिएका थिए । एकअर्काविरुद्ध खेलाडीका रुपमा समेत आमनेसामने भइसकेका रियलका प्रशिक्षक एन्सेलोटी र एथ्लेटिकका मार्सेलिनोमध्ये कसको रणनीति आज रियादमा सफल हुने हो त्यसको लागि मैदानमा हुने खेलको अन्तिम नतिजा कुर्नुपर्ने हुन्छ ।
३० हजार समर्थकको अघि हुने फाइनलका लागि दुवै टोलीका प्रशिक्षकले एकअर्काविरुद्ध रणनीति बनाइसकेको बताएका छन् ।
परिमार्जनसहितको काउन्टर अट्याकिङ फुटबल पस्किने तयारी रियलका प्रशिक्षक एन्सेलोटीले गरिरहँदा मार्सेलिनो त्यसका लागि तयार रहेका छन् ।
अघिल्लो संस्करणको स्पेनिस सुपर कपको विजेता समेत रहेको एथ्लेटिक यस संस्करणमा समेत उपाधि जित्न चाहन्छ । आजको फाइनलमा रियललाई हराए एथ्लेटिकले चौथो पटक स्पेनिस सुपर कपको उपाधि जित्नेछ ।
प्रतियोगिताको उपाधि सबैभन्दा धेरै पटक बार्सिलोनाले (१३ पटक) जित्दा एथ्लेटिकको आजको प्रतिद्वन्द्वी रियलले भने ११ पटक जितेको छ ।
