नेपाली राष्ट्रिय फुटबल टिमका मुख्य प्रशिक्षक अबदुल्लाह अलमुताइरीले मैदानमा गएर ‘ए’ डिभिजन लिगका खेलहरू नहर्ने घोषणा गरेका छन् ।
सामाजिक सञ्जाल फेसबुकमार्फत अलमुताइीले मैदानमै गएर लिगका खेल नहेर्ने बताउँदै टिभीमै हेर्ने घोषणा गरे ।
लिगमा सहभागी क्लबहरूले अलमुताइरीले बन्द प्रशिक्षमा परेका खेलाडीलाई विभिन्नखाले दबाब दिएको आरोप लगाएका थिए । ती क्लबहरूको आरोप खण्डन गर्दै अलमुताइरीले फेसबुकमा लेखेका छन्, ‘यदि लिग खेलहरूमा मेरो उपस्थितिले खेलाडी वा क्लबहरूमाथि दबाब पर्छ भने मसँग समाधान छ, म टेलिभिजनमा खेलहरू हेर्छु ।
अलमुताइरीले आफूले कहिल्यै पनि कुनै खेलाडीलाई लिगका खेलमा शतप्रतिशत प्रदर्शन नगर्न दबाब नदिएको दाबी गरे । ‘मलाई विश्वास छ कि क्लबमा शतप्रतिशत नखेल्ने खेलाडीले राष्ट्रिय टोलीमा कहिल्यै पनि शतप्रतिशत प्रदर्शन गर्न सक्दैनन,’ उनले थपे ।
अलमुताइरीले फुटबलको विकासका लागि क्लब र लिग फुटबल नै मुख्य कारक रहेको भन्दै आफूले कसरी खेलाडीहरूलाई शतप्रतिशत प्रदर्शन नगर्न आग्रह गर्न सक्छु भन्दै प्रश्नसमेत गरेका छन् ।
