कारबाओ कपमा १० खेलाडीमा सीमित आर्सनलले लिभरपुललाई बराबरीमा रोकेको छ । बिहीबार राति भएको सेमिफाइनलको पहिलो लेगको खेलमा आर्सनलले लिभरपुललाई उसैको घरमा गोलरहित बराबरीमा रोकेको हो ।
एन्फिल्डमा भएको खेलमा निर्धारित समय दुवै टोलीले गोल गर्न सकेनन् । बरु खेलको २४औँ मिनेटमा ग्रानिट हाकाले रातो कार्ड खाँदै मैदान छोडेपछि आर्सनल १० खेलाडीमा सीमित बन्न पुग्यो । तर त्यसको फाइदा लिभरपुलले उठाउन सकेन ।
अब, आर्सनल र लिभरपुलबीचको दोस्रो लेगको खेल २० जनवरीमा हुनेछ । जसमा जित निकाल्ने टिमले फाइनलमा चेल्सीको सामना गर्ने छ । चेल्सी टोटनहमविरुद्ध समग्रमा ३–० गोलको नतिजासहित फाइनलमा पुगिसकेको छ । कारबाओ कपको फाइनल २७ फेब्रुअरीमा हुनेछ ।
