काठमाडौं – आईसीसी मेन्स टी–२० विश्वकपको पहिलो सेमिफाइनलमा आज दक्षिण अफ्रिका र न्युजिल्यान्ड भिड्दैछन्। सेमिफाइनलको यो खेल भारतको इडेन गार्डेन मैदानमा हुँदैछ। खेल बुधबार साँझ ७:१५ बजे सुरु हुनेछ।
समूह चरणका चारै खेल जित्दै समूह ‘डी’को विजेता बनेर सुपर–८ मा पुगेको दक्षिण अफ्रिकाले यस विश्वकपमा अहिलेसम्म हार बेहोरेको छैन। सुपर–८ को समूह १ मा दक्षिण अफ्रिकाले पहिलो खेलमा भारतलाई ७६ रनले हरायो भने दोस्रो खेलमा वेस्ट इन्डिजलाई ९ विकेटले पराजित गर्यो। अन्तिम खेलमा जिम्बावेलाई ५ विकेटले हराउँदै सेमिफाइनल यात्रा तय गरेको हो।
यता न्युजिल्यान्ड भने समूह चरणदेखि नै उतारचढाव पार गर्दै सुपर–८ हुँदै सेमिफाइनल पुगेको हो। समूह चरणका चार खेलमध्ये तीन जित र एक हार बेहोरेको न्युजिल्यान्ड सुपर–८ मा अंक बाँडेकै आधारमा अन्तिम चारमा प्रवेश गरेको हो।
सुपर–८ अन्तर्गत पाकिस्तानसँगको पहिलो खेल वर्षाले अवरुद्ध हुँदा एक अंक पाएको न्युजिल्यान्डले दोस्रो खेलमा सहआयोजक श्रीलंकालाई ६१ रनले हरायो। तर अन्तिम खेलमा इंग्ल्यान्डसँग ४ विकेटले पराजित भएको थियो।
दक्षिण अफ्रिका समूह १ को विजेता बन्दै सेमिफाइनलमा पुगेको हो भने न्युजिल्यान्ड समूह २ को उपविजेता बनेर अन्तिम चारमा प्रवेश गरेको हो। अपराजित दक्षिण अफ्रिका सेमिफाइनल भिडन्तमा तुलनात्मक रूपमा बलियो देखिएको छ।
दोस्रो सेमिफाइनलमा बिहीबार भारत र इंग्ल्यान्ड आमनेसामने हुनेछन् भने टी–२० विश्वकपको फाइनल आइतबार हुनेछ।
