विराटनगर । लामो समय प्रशिक्षकबिहीन बनेको नेपाली राष्ट्रिय फुटबल टोलीको नेतृत्व अब स्विटजरल्यान्डका गुग्लिएल्मो एरेनाले गर्ने भएका छन् । अखिल नेपाल फुटबल संघले मुख्य प्रशिक्षकको जिम्मेवारी दिँदै नियुक्त गरेपछि खेलाडी र फुटबल समर्थकमा एउटा नयाँ आशा पलाएको छ ।
एरेनाले यसअघि विभिन्न देशका क्लब टोलीहरू सम्हालेका छन् । सन् २०११ मा उनले सिंगापुरको क्लब एतोइल एफसीको प्रशिक्षकका रूपमा काम गरेका थिए । त्यसपछि २०१२ मा अल्जेरियाको क्लब सिआर बेलौइजदादको प्रशिक्षक बनेका थिए ।
त्यसैगरी २०१८ मा जाम्बियाको बिल्डकन एफसीको प्रशिक्षक बनेका एरेनाले त्यसपछि स्विट्जरल्याण्डको एफसी कोन्ते पनि सम्हालेका थिए । सन् २०२० मा उनले मोरक्कोको क्लब आरसी ओउएद जेमको प्रशिक्षकका रूपमा काम गरेका थिए ।
पछिल्लो पटक २०२३ मा उनले लाओसको यु २३ को कार्यवाहक प्रशिक्षकको जिम्मेवारी निर्वाह गरेका थिए । नेपालले भने एरेनालाई एक वर्षको जिम्मेवारी सुम्पिएको छ ।
अब, एरेनाको परीक्षा चैत १३ गतेबाट सुरु हुनेछ । उनले आफ्नो पहिलो जिम्मेवारीका रूपमा हङकङ (चीन) विरुद्धको अन्तर्राष्ट्रिय खेल खेलाउने छन् । हङकङ र नेपालबीचको मैत्रीपूर्ण खेल दशरथ रंगशालामा हुने छ ।
