काठमाडौं – गोकुलप्रसाद बास्कोटा ले राष्ट्रिय स्वतन्त्र पार्टी नेतृत्वको नयाँ सरकारलाई काम गर्न पर्याप्त समय दिनुपर्ने बताएका छन्।
बुधबार सामाजिक सञ्जाल फेसबुकमार्फत प्रतिक्रिया दिँदै उनले रास्वपाले झन्डै दुईतिहाइ बहुमतसहित चुनाव जितेपछि सरकार कसरी सञ्चालन गर्ने भन्ने जिम्मेवारी उनीहरूकै भएको उल्लेख गरेका छन्। बास्कोटाले नयाँ सरकारले काम थालेको कम्तीमा तीन महिनासम्म अन्य पक्षबाट टिप्पणी गर्नु उपयुक्त नहुने बताएका छन्।
उनका अनुसार जनता सधैँ साझा रहने भए पनि यसपटक मतदाताले रास्वपालाई रोजेका हुन्। उनले रास्वपाका वाचामा जनताले विश्वास गरेको भन्दै अब सरकारलाई काम गर्न दिनुपर्ने धारणा व्यक्त गरेका छन्। उनले अनावश्यक आलोचना र खिचातानी नगर्न आग्रह गर्दै सरकारलाई सहज वातावरणमा काम गर्न दिनुपर्नेमा जोड दिएका छन्।
‘रास्वपाले चुनाव जित्यो, अब कसरी चलाउँछन् भन्ने उनीहरूकै कुरा हो। नयाँ सरकारले काम थालेको तीन महिनासम्म अरुले केही बोल्नु नै बेकार हो,’ उनले भने, ‘जनता साझा थिए, छन् र हुने नै छन्। फरक यति हो कि यसपटक जनताले उनीहरूलाई रोजे र उनीहरूको वाचा पत्याए। खाँबो चिथोर्न बन्द गरे हुने।’
