रियल मड्रिड स्पेनिस सुपर कपको फाइनलमा प्रवेश गरेको छ ।
आजको भएको खेलमा चिरप्रतिद्वन्द्वी बार्सिलोनाविरूद्ध ३–२ गोलान्तरको सङ्घर्षपूर्ण जित निकाल्दै रियलले फाइनलमा स्थान बनाउन सफल भएको हो ।
रियलको जितमा भिनिसियस जुनियर, करिम बेन्जेमा र फेडेरिको भाल्भर्डेले समान एक–एक गोल गरे । दुई पटक लिएको अग्रता जोगाउन नसकेपछि खेल अतिरिक्त समयमा धकेलिएको थियो ।
खेलको पहिलो गोल गर्दै भिनिसियसले २५औं मिनेटमा रियललाई सुरुवाती अग्रता दिलाएका थिए । तर ४१औं मिनेटमा लुक डि योङले गोल गर्दै बार्सिलोनालाई खेलमा फर्काएका थिए ।
पहिलो हाफमा १–१ गोलको बराबरी खेलेका दुवै टीमले दोस्रो हाफको निर्धारित समयमा थप एक–एक गोल गरेपछि खेल अतिरिक्त समयमा धकेलिएको थियो ।
रियललाई दोस्रो पटक अग्रता दिलाउन कप्तान बेन्जेमाले गोल गरे । तर बेन्चबाट मैदान प्रवेश गरेको केही मिनेटमा नै बार्सिलोनाका आन्सु फातीले खेलको ८४औं मिनेटमा हेडमार्फत गोल गर्दै बार्सिलोनालाई खेलमा फर्काउन प्रयास गरे ।
फातीको गोलसँगै अतिरिक्त समयमा लम्बिएको खेलको ९८औं मिनेटमा फेडरिको भाल्भर्डेले गोल गरेसँगै खेल रियलले आफ्नो पक्षमा पार्न सफल भयो ।
आजको जितसँगै रियलले स्पेनिस सुपर कपको फाइनलमा आफ्नो स्थान सुरक्षित गरिसकेको छ । उपाधि भिडन्तका लागि रियलले भोलि हुने एट्लेटिको मड्रिड र एथ्लेटिक क्लबबीचको खेलको विजेतासँग प्रतिष्पर्धा गर्नुपर्नेछ ।
