लागुऔषध कारोबार आरोपमा पक्राउ परेका र्यापर आशिष राना ‘लाउरे’ ले ८ दिन प्रहर थुनामा बस्नु पर्ने भएको छ । जिल्ला अदालत कास्कीले लाउरेसहित चार जनालाई ८ दिन थुनामा राखेर अनुसन्धान प्रक्रिया अगाडि बढाउन आदेश दिएको हो ।
अब, नयाँबजारका ३२ वर्षीय लाउरेसहित, पोखरा ११ का ३९ वर्षीय ध्रुवबहादुर थापा, पोखरा ७ का ३० वर्षीय नवीन गुरुङ र पोखरा ८, सभागृहका २२ वर्षीया सुस्मिता गुरुङले ८ दिन प्रहरी थुनामा बस्नुपर्ने भएको हो । उनीहरूलाई बुधबार राति करिब ७ बजे जिल्ला प्रहरी कार्यालय कास्कीले पोखराले ब्राउनसुगरसहित पक्राउ गरेको थियो ।
बुधबार पक्राउ परेका भएपनि बिहीबार तमु ल्होसारको अवसरमा दिइएको सार्वजनिक बिदाका कारण अदालत बन्द रहेकाले शुक्रबारमात्रै अदालतले आदेश दिएको हो । प्रहरीका अनुसार लाउरेसहित चार जना ब्राउन सुगर सेवन गरिरहेका बेला पक्राउ परेका थिए । उनीहरू सेवनमात्र गर्थे कि ओसारपसारमा पनि संलग्न छन् भनेर अनुसन्धान भइरहेको छ ।
उनीहरूमाथि ब्राउन सुगर ओसारपसारको पनि आरोप रहेको प्रहरीले जनाएको छ । प्रहरीले उनीहरूबाट करिब १३ ग्राम ब्राउन सुगर बरामद गरेको थियो ।
जिल्ला प्रहरी कार्यालय कास्कीका प्रवक्ता डिएसपी सुन्दर तिवारीका अनुसार लागुऔषध कारोबारबारेको सूचनापश्चात सुरुमा नवीन गुरुङको साथबाट शून्य दशमलव ५१ ग्राम ब्राउन सुगर फेला परेको थियो । पछि सोधपुछका क्रममा सुस्मिता गुरुङको कोठामा १२ दशमलव ५० ग्राम ब्राउन सुगर लुकाइराखेको भेटिएको थियो ।
लामो समयदेखि र्याप गाउँदै आएका लाउरे बार्ज र्याप ब्याटलबाट चर्चामा आएका थिए। उनका ‘मेरो सोल्टा’, ‘नेपहपको बाटो’, ‘चुप लाग’ लगायत गीत चर्चित छन् । उनले ‘ताण्डव’ फिल्ममा अभिनेताको रूपमा काम गरेका छन् भने रियालिटी शो हिमालय रोडिजमा पनि आबद्ध छन् ।
