भूमि व्यवस्थापन, नापी र इलाका प्रशासनलगायत सरकारी सेवा स्थानीय तहमै विस्तार भएपछि कालीकोटको रास्कोट नगरपालिकाका बासिन्दालाई सहज भएको छ। सामान्य सरकारी कामका लागि समेत सदरमुकाम मान्म पुग्नुपर्ने बाध्यता हट्दै गएपछि स्थानीय क्षेत्रमा आर्थिक तथा प्रशासनिक गतिविधि बढ्न थालेका छन्।
सेवा विस्तारसँगै नगरपालिकाबाट पहिलोपटक जग्गा राजीनामाको कामसमेत सम्पन्न भएको छ। पहिलो सेवाग्राहीका रूपमा रास्कोट नगरपालिका–६ की ७६ वर्षीया मनपुरा फर्सालले सोही वडाका बरे सार्कीलाई जग्गा राजीनामा हस्तान्तरण गरेकी हुन्।
नगरपालिकाबाटै जग्गासम्बन्धी काम भएपछि मान्म पुग्न लाग्ने समय र खर्च जोगिएको फर्सालले बताइन्। यसअघि सामान्य कामका लागि पनि सदरमुकाम पुग्नुपर्ने अवस्थाले निकै सास्ती हुने गरेको उनको भनाइ छ।
नगरपालिकाका प्रमुख धर्मराज शाहीका अनुसार नागरिकलाई आफ्नै ठाउँबाट सरकारी सेवा उपलब्ध गराउने उद्देश्यले भूमि व्यवस्थापन, नापी, करदाता र इलाका प्रशासनका सेवा विस्तार गरिएको हो। यी सेवा सञ्चालनमा आएपछि जग्गा पास, नागरिकता, राष्ट्रिय परिचयपत्र तथा अन्य प्रशासनिक कामका लागि सदरमुकाम धाउनुपर्ने अवस्था कम भएको उनले बताए।
भूमि व्यवस्थापन शाखा प्रमुख धनबहादुर फडेराका अनुसार सेवा सुरु भएपछि हालसम्म तीनवटा जग्गा राजीनामा, एउटा नामसारी र एउटा अंश भरपाईको काम सम्पन्न भएको छ। भूमि व्यवस्थापनका लागि तीन जना र नापी सेवाका लागि दुई जना कर्मचारी खटिएर नियमित सेवा दिइरहेका छन्।
रास्कोटमा इलाका प्रशासन सेवा भने सात महिनाअघिदेखि सञ्चालनमा छ। यस कार्यालयबाट रास्कोटसहित सान्नीत्रिवेणी, पचालझरना र पलाँता गाउँपालिकाका नागरिकले सेवा लिँदै आएका छन्।
इलाका प्रशासन कार्यालयका प्रमुख नमराज बमका अनुसार हालसम्म चार पालिकाका नागरिकमध्ये एक हजार ७९३ जनाले नयाँ नागरिकता र एक हजार ४०२ जनाले नागरिकताको प्रतिलिपि लिएका छन्। त्यस्तै, चार हजार २०० जनाले नयाँ राष्ट्रिय परिचयपत्र बनाएका छन् भने २०५ जनाले परिचयपत्र कार्ड प्राप्त गरेका छन्।
भौगोलिक विकटता र यातायातको कठिनाइका कारण सरकारी सेवा लिन सदरमुकाम पुग्नुपर्ने बाध्यता झेल्दै आएका स्थानीयलाई सेवा विस्तारले ठूलो राहत दिएको छ। स्थानीय तहमै सरकारी कार्यालयका सेवा उपलब्ध हुन थालेपछि नागरिकको समय, श्रम र खर्चसमेत बचत हुन थालेको छ।
