विराटनगर । बोस्टनमा सम्पन्न फिफा विश्वकप २०२६ अन्तर्गत समूह ‘एल’ को खेलमा घानाले बलियो मानिएको इंग्ल्यान्डलाई गोलरहित बराबरीमा रोक्दै महत्त्वपूर्ण एक अंक बटुलेको छ ।
स्टार खेलाडीहरूले भरिएको इंग्लिस टोलीले अधिकांश समय बल आफ्नो नियन्त्रणमा राखे पनि घानाको अनुशासित रक्षापंक्तिसमक्ष निरीह रह्यो ।
पहिलो खेलमा क्रोएसियामाथि ४–२ को प्रभावशाली जित निकालेको इंग्ल्यान्ड दोस्रो खेलमा भने अपेक्षाअनुसार प्रस्तुत हुन सकेन ।
प्रशिक्षक थोमस टुखेलको टोलीले खेलभरि आक्रमणको प्रयास गरे पनि स्पष्ट अवसर सिर्जना गर्न संघर्ष गर्नुपर्यो ।
घानाले प्रशिक्षक कार्लोस क्वेरोजको योजनाअनुसार सघन रक्षात्मक रणनीति अपनाउँदै इंग्ल्यान्डका स्टार खेलाडीलाई प्रभावहीन बनायो ।
कप्तान ह्यारी केनमाथि सबैको नजर थियो । क्रोएसियाविरुद्ध दुई गोल गरेका केनले घानाविरुद्ध भने आफ्नो लय कायम राख्न सकेनन् ।
खेलको अन्तिमतिर निको ओ’राइलीको हेडर क्रसबारमा लागेर फर्किएपछि प्राप्त सुनौलो अवसरमा केनले नजिकैबाट गरेको प्रहार बारमाथिबाट बाहिर पठाए ।
त्यो गोल भएको भए उनले विश्वकपमा इंग्ल्यान्डका लागि सर्वाधिक गोलकर्ताको ग्यारी लिनेकरको १० गोलको कीर्तिमान तोड्ने थिए ।
पहिलो हाफ अपेक्षाकृत निस्तेज रहे पनि दोस्रो हाफमा दुवै टोलीले केही अवसर सिर्जना गरेका थिए ।
घानाका प्रिन्स क्वाबेना अडुले गोलको अवसर पाए पनि जोर्डन पिकफोर्डले उत्कृष्ट बचाउ गरे । अन्तिम समयमा मार्क गुएहीको प्रयास गोललाइनबाट क्लियर भएपछि इंग्ल्यान्ड जितबाट बञ्चित रह्यो ।
बराबरीपछि इंग्ल्यान्डको दुई खेलबाट चार अंक पुगेको छ र टोली समूहको शीर्ष स्थानमा कायम छ । घानाको पनि चार अंक पुगेको छ र नकआउट चरण पुग्ने सम्भावना बलियो बनेको छ ।
अब अन्तिम खेलमा इंग्ल्यान्डले पनामासँग खेल्नेछ भने घानाले क्रोएसियाको सामना गर्नेछ ।
विश्वकप उपाधिको दाबेदार मानिएको इंग्ल्यान्डका लागि यो नतिजा चेतावनीका रूपमा आएको छ भने घानाले उत्कृष्ट रक्षात्मक प्रदर्शनमार्फत आफूलाई सहज प्रतिद्वन्द्वी नभएको प्रमाणित गरेको छ ।
