विराटनगर । फिफा विश्वकप २०२६ पोर्चुगलले उज्वेकिस्तानलाई पराजित गर्दै नकआउट चरणको ढोका लगभग खुला गरेको छ ।
ह्युस्टनमा मंगलबार राति भएको समूह ‘के’ को खेलमा पोर्चुगलले उज्वेकिस्तानमाथि ५–० गोलको सानदार जित निकाल्दा कप्तान क्रिस्टियानो रोनाल्डोले रेकर्डमाथि रेकर्ड बनाए ।
पहिलो खेलमा डीआर कंगोसँग १–१ को बराबरीमा रोकिएको पोर्चुगलले दोस्रो खेलमा भने उत्कृष्ट पुनरागमन गर्दै आफ्नो वास्तविक शक्ति देखाएको थियो ।
जसमा पोर्चुगलका कप्तान क्रिस्टियानो रोनाल्डोले पहिलो हाफमै दुई गोल गर्दै आलोचकलाई जवाफ दिए ।
नुनो मेन्डेस र राफाएल लिआओले पनि गोल गरे भने अर्को गोल उज्वेकिस्तानका गोलकिपर अब्दुभोइद नेमातोभको आत्मघाती गोलका रूपमा आयो । पोर्चुगलले खेलभरि दबाब कायम राख्दै १७ वटा प्रहार गरेको थियो ।
रोनाल्डोले बनाए ऐतिहासिक कीर्तिमान
४१ वर्षीय रोनाल्डोले उज्वेकिस्तानविरुद्धको खेलमा गोल गर्दै पुरुष फुटबल इतिहासमा ६ वटा फरक विश्वकपमा गोल गर्ने पहिलो खेलाडी बने । उनले सन् २००६, २०१०, २०१४, २०१८, २०२२ र २०२६ गरी लगातार ६ विश्वकपमा गोल गर्ने अद्वितीय उपलब्धि हासिल गरेका हुन् ।
दुई गोलसँगै उनले विश्वकपमा आफ्नो गोल संख्या १० पुर्याएका छन् । यससँगै उनले पोर्चुगलका महान स्ट्राइकर युसेबियोको ९ गोलको कीर्तिमान उछिन्दै विश्वकपमा पोर्चुगलका सर्वाधिक गोलकर्ता बनेका छन् ।
त्यसैगरी, यो उनको अन्तर्राष्ट्रिय करियरको २३०औँ खेल थियो, जुन पुरुष फुटबल इतिहासकै सर्वाधिक हो । दुई गोलसँगै उनको अन्तर्राष्ट्रिय गोल संख्या १४५ पुगेको छ ।
डीआर कंगोविरुद्ध गोल गर्न नसकेपछि रोनाल्डोमाथि सुरुआती रोजाइबाट हटाउनुपर्ने आवाज उठेको थियो । तर उज्वेकिस्तानविरुद्ध उनले दुई गोल गर्दै आफू अझै निर्णायक खेलाडी भएको प्रमाणित गरे । खेलपछि उनले “म फर्किएको छु” भन्दै प्रतिक्रिया दिएका थिए ।
विश्वकपको आफ्नो सम्भवतः अन्तिम यात्रामा रहेका रोनाल्डोले फेरि एकपटक इतिहास लेख्दै आफूलाई केवल पोर्चुगलका मात्र होइन, विश्व फुटबलकै महानतम खेलाडीमध्ये एकका रूपमा स्थापित गरिरहेका छन् ।
यो जितसँगै पोर्चुगलको ४ अंक भएको छ र टोली समूह ‘के’ बाट अन्तिम ३२ मा पुग्ने बलियो अवस्थामा पुगेको छ । अब रोबर्टो मार्टिनेजको टोलीले अन्तिम समूह खेलमा कोलम्बियाको सामना गर्नेछ । उता लगातार दोस्रो हार बेहोरेको उज्वेकिस्तान भने प्रतियोगिताबाट बाहिरिने संघारमा पुगेको छ ।
