विराटनगर । फिफा विश्वकप २०२६ अन्तर्गत समूह ‘के’ मा आज पोर्चुगल र उज्बेकिस्तानबीच महत्त्वपूर्ण प्रतिस्पर्धा हुँदैछ । ह्युस्टन स्टेडियममा हुने खेलमा दुवै टोली पहिलो जितको खोजीमा मैदान उत्रिँदैछन् ।
उद्घाटन खेलमा डीआर कंगोसँग १–१ को बराबरीमा रोकिएको पोर्चुगलमाथि जित निकाल्ने दबाब छ । रोबर्टो मार्टिनेजको टोलीले पहिलो खेलमा ७५ प्रतिशत बल नियन्त्रण राखे पनि अपेक्षाअनुसार आक्रमणमा धार देखाउन सकेको थिएन । त्यसैले समूह चरण पार गर्ने सम्भावना बलियो बनाउन पोर्चुगललाई आजको खेल जित्नैपर्ने अवस्था छ ।
पोर्चुगलका कप्तान क्रिस्टियानो रोनाल्डोले विश्वकपको आफ्नो छैटौं सहभागितामा पहिलो गोलको खोजी गरिरहेका छन् । ब्रुनो फर्नान्डेस, बर्नार्डो सिल्भा, भिटिन्हा, नुनो मेन्डेस र जोआओ नेभेसजस्ता स्टार खेलाडीबाट पनि टोलीले उच्च प्रदर्शनको अपेक्षा गरेको छ । रोनाल्डोलाई विश्राम दिने वा सुरुआती टोलीमै राख्नेबारे चर्चा भए पनि प्रशिक्षक मार्टिनेजले अन्तिम निर्णय गोप्य राखेका छन् ।
यता पहिलोपटक विश्वकप खेलिरहेको उज्बेकिस्तान पनि अंकविहीन छ । पहिलो खेलमा कोलम्बियासँग ३–१ ले पराजित भएको टोली आजको खेलबाट पुनरागमन गर्ने लक्ष्यमा छ । विश्वविजेता पूर्वकप्तान फाबियो कानाभारोको प्रशिक्षणमा रहेको उज्बेकिस्तानसँग एल्डोर शोमुरोदोभ, अब्दुकोदिर खुसानोभ र अब्बोसबेक फैजुल्लायेभजस्ता प्रभावशाली खेलाडी छन् ।
समूह ‘के’ मा कोलम्बिया शीर्ष स्थानमा रहेकाले पोर्चुगल र उज्बेकिस्तान दुवैका लागि आजको खेल निर्णायक मानिएको छ । पोर्चुगल कागजमा बलियो देखिए पनि पहिलो खेलमा देखिएको फितलो प्रदर्शन दोहोरिए उज्बेकिस्तानले अर्को आश्चर्यजनक नतिजा निकाल्न सक्ने सम्भावना पनि रहेको छ ।
पोर्चुगलका लागि अनुभव र स्टार खेलाडीहरूको क्षमता मुख्य बल हो भने उज्बेकिस्तान तीव्र काउन्टर आक्रमण र युवा ऊर्जाको भरमा इतिहास रच्ने लक्ष्यसहित मैदान उत्रिनेछ । आजको खेलको नतिजाले समूह ‘के’ को समीकरणमा ठूलो प्रभाव पार्ने अपेक्षा गरिएको छ ।
