काठमाडौं – राष्ट्रपति रामचन्द्र पौडेल मित्रराष्ट्र जापानको औपचारिक भ्रमणका लागि आज त्यसतर्फ प्रस्थान गर्नुभएको छ। त्रिभुवन अन्तरराष्ट्रिय विमानस्थलको अति विशिष्ट कक्षमा उपराष्ट्रपति रामसहायप्रसाद यादव, प्रधानमन्त्री सुशीला कार्की, मन्त्रीगण, सुरक्षा निकायका प्रमुख, नेपाल सरकारका उच्च पदस्थ अधिकारी तथा नेपालका लागि जापानी राजदूतलगायतले राष्ट्रपति पौडेललाई बिदाइ गरेका थिए।
राष्ट्रपति पौडेल नेतृत्वको प्रतिनिधिमण्डलमा उहाँकी धर्मपत्नी सविता पौडेल, नेपाल सरकारका उच्च अधिकारी तथा राष्ट्रपति कार्यालयका पदाधिकारीहरू सहभागी छन्। राष्ट्रपति पौडेल माघ २१ गते स्वदेश फर्कने कार्यक्रम रहेको छ।
नेपाल–जापान कूटनीतिक सम्बन्ध स्थापनाको ७०औँ वर्षगाँठका अवसरमा जापान सरकारको निमन्त्रणामा राष्ट्रपति पौडेलले नेपाली प्रतिनिधिमण्डलको नेतृत्व गर्दै जापान भ्रमण गर्नुभएको परराष्ट्र मन्त्रालयले जनाएको छ।
भ्रमणका क्रममा राष्ट्रपति पौडेल आजै नेपाल–जापान कूटनीतिक सम्बन्धको ७०औँ वार्षिकोत्सवको अवसरमा जापान सरकारद्वारा आयोजना हुने विशेष स्वागत समारोहमा सहभागी हुने कार्यक्रम छ।
माघ २० गते टोकियोस्थित इम्पेरियल प्यालेसमा राष्ट्रपति पौडेलले जापानका सम्राट नारुहितोसँग राजकीय शिष्टाचार भेट गर्नुहुनेछ। सोही दिन जापानका प्रधानमन्त्री सुश्री ताकाइची सानाएसँग पनि भेटवार्ता हुने कार्यतालिका तय भएको छ।
यसैगरी भ्रमणका क्रममा जापानका विदेश राज्यमन्त्री होरिइ इवाओसँग शिष्टाचार भेटवार्ता, जापानी व्यावसायिक समुदायसँगको बैठक तथा जापानस्थित नेपाली राजदूतावासद्वारा आयोजित स्वागत समारोहमा राष्ट्रपति पौडेलको सहभागिता रहनेछ।
नेपाल–जापान सम्बन्ध अठारौँ शताब्दीको अन्त्यतिरबाट सुरु भएको मानिन्छ। सन् १९५६ सेप्टेम्बर १ मा कूटनीतिक सम्बन्ध स्थापना भएपछि यो सम्बन्ध औपचारिक भएको हो। नेपालले सन् १९६५ मा टोकियोमा र जापानले सन् १९६७ मा काठमाडौँमा आफ्ना दूतावास स्थापना गरेका थिए। ओसाकामा नेपालको मानार्थ वाणिज्य दूतावास पनि सञ्चालनमा छ।
जापानी बौद्ध भिक्षु रेभ एकाइ कावागुची सन् १८९९ मा तिब्बतको बाटो हुँदै नेपाल आएका थिए। उनले आफ्ना लेखन तथा प्रकाशनमार्फत जापानमा नेपाल र लुम्बिनीको महत्व परिचित गराएको इतिहासकारहरू बताउँछन्।
जापानले सन् १९५४ देखि नेपालको सामाजिक–आर्थिक विकासमा सहयोग गर्दै आएको छ। जापानले अनुदान, सहुलियतपूर्ण ऋण, बहुपक्षीय सहायता र प्राविधिक सहयोगमार्फत विद्युत् उत्पादन, सडक, पुल, खानेपानी, दूरसञ्चारलगायत आधारभूत पूर्वाधार विकासमा योगदान पुर्याउँदै आएको छ।
सिन्धुली सडक, कुलेखानी जलविद्युत् आयोजना, कालीगण्डकी ‘ए’, उदयपुर सिमेन्ट उद्योग, मेलम्ची खानेपानी आयोजना, नागढुङ्गा सुरुङ मार्गलगायत परियोजनाहरू जापानी सहयोगका प्रमुख उदाहरण हुन्।
