काठमाडौं । सरकारले पूर्वप्रधानन्यायाधीश चोलेन्द्रशमशेर जबरालाई जेनजी समूहबाट नभई अपरिचित समूहबाट सुरक्षा थ्रेट आएको स्पष्टीकरण दिएको छ।
मंगलबार सिंहदरबारमा सञ्चारकर्मीसँग कुरा गर्दै सरकारका प्रवक्ता एवं शिक्षामन्त्री सस्मित पोखरेलले जबरालाई फोन तथा टेक्स्टमार्फत अपरिचित समूहबाट धम्की आएको बताए।
उनका अनुसार सुरक्षा थ्रेट आएपछि सरकारले जबरालाई सुरक्षित स्थानमा राखेको हो।
‘कहिँबाट पनि सरकारबाट वा प्रहरीबाट जेनजीबाट सुरक्षा थ्रेट भएको भनिएको छैन। त्यो मिडियामा आएको कुरा हो,’ प्रवक्ता पोखरेलले भने, ‘जेनजीबाट त्यो थ्रेट आएको होइन, अपरिचित समूहबाट आएको कुरा उहाँलाई फोनमा टेक्स्टमार्फत नै आइसकेपछि सुरक्षित स्थानमा लगिएको हो।’
जबरालाई सुरक्षित स्थानमा लगिसकेपछि पनि थप सुरक्षा थ्रेट आएको जानकारी परिवारबाट प्राप्त भएको पोखरेलले बताए।
‘सुरुमै थ्रेटहरू आइसकेको थियो। थ्रेट आएपछि उहाँलाई सुरक्षित स्थानतर्फ लगियो। त्यसपछि पनि अझै सुरक्षा थ्रेट भएको छ भन्ने कुरा परिवारबाट आएको हो,’ उनले भने।
सरकारले जबरालाई जेनजी समूहबाट सुरक्षा खतरा रहेको भन्दै सुरक्षित स्थानमा लगिएको भन्ने सार्वजनिक चर्चाको खण्डन गर्दै थ्रेटको स्रोत अपरिचित समूह रहेको स्पष्ट पारेको हो।
