काठमाडौं । प्रधानमन्त्री वालेन्द्र शाह संयुक्त राष्ट्रसंघको ८१औँ महासभामा सहभागी भएर शनिबार स्वदेश फर्किएका छन्।
१४ सदस्यीय नेपाली प्रतिनिधिमण्डलको नेतृत्व गर्दै प्रधानमन्त्री शाह असोज ६ गते कतारको दोहा हुँदै अमेरिकाको न्युयोर्क प्रस्थान गरेका थिए। परराष्ट्र मन्त्रालयका अनुसार उनी असोज १० गते स्वदेश फर्किने तालिका थियो।
न्युयोर्कमा रहँदा प्रधानमन्त्री शाहले संयुक्त राष्ट्रसंघका महासचिव एन्टोनियो गुटेरेससँग भेटवार्ता गरेका थिए। महासभामा सम्बोधन गर्नुअघि भएको भेटमा नेपालको पछिल्लो विपद्, जलवायु परिवर्तन तथा नेपालका प्राथमिकताका विषयमा छलफल भएको थियो।
प्रधानमन्त्री शाहले असोज ९ गते शुक्रबार संयुक्त राष्ट्रसंघको ८१औँ महासभाको उच्चस्तरीय सत्रलाई नेपालको तर्फबाट सम्बोधन गरेका थिए। सम्बोधनका क्रममा उनले नेपालले भोगिरहेको जलवायुजन्य विपद्, भोटेकोशी–त्रिशूली बाढीबाट भएको क्षति तथा जलवायु न्यायको विषय अन्तर्राष्ट्रिय समुदायसमक्ष उठाएका थिए।
प्रधानमन्त्री शाहले जलवायु संकट सिर्जना गर्न नेपालको योगदान न्यून भए पनि त्यसको असर नेपालले ठूलो रूपमा भोगिरहेको उल्लेख गर्दै हिमाली क्षेत्रमा बढ्दो जोखिमप्रति विश्व समुदायको ध्यानाकर्षण गराएका थिए। उनले बाढी, पहिरो र हिमनदी पग्लिने क्रमले नेपालसँगै हिमाली क्षेत्रका अन्य मुलुकमा समेत जोखिम बढाइरहेको बताएका थिए।
भ्रमणका क्रममा प्रधानमन्त्री शाह न्युयोर्कस्थित संयुक्त राष्ट्रसंघका लागि नेपालको स्थायी नियोगमा आयोजित विभिन्न ब्रिफिङ तथा औपचारिक कार्यक्रममा समेत सहभागी भएका थिए। महासभामा सहभागी भएपछि उनी न्युयोर्कबाट दोहा हुँदै काठमाडौं फर्किएका हुन्।
प्रधानमन्त्रीको भ्रमणका क्रममा परराष्ट्रमन्त्री शिशिर खनालसहित उच्च सरकारी अधिकारीहरू पनि संयुक्त राष्ट्रसंघको महासभाका विभिन्न उच्चस्तरीय बैठक, साइड इभेन्ट तथा मन्त्रीस्तरीय कार्यक्रममा सहभागी भएका थिए।
प्रधानमन्त्री शाहको भ्रमणबारे परराष्ट्र मन्त्रालयले प्रेस ब्रिफिङमार्फत थप जानकारी दिने तयारी गरेको छ।
