काठमाडौं । पूर्वराष्ट्रपति विद्यादेवी भण्डारी नेकपा एमालेको वरिष्ठ नेतामा अनुमोदित भएकी छन्। बिहीबार बसेको एमाले केन्द्रीय कमिटी बैठकले उनलाई पार्टीको सम्मानित वरिष्ठ नेताको जिम्मेवारी दिने सचिवालयको निर्णय अनुमोदन गरेको हो।
यसअघि बिहीबार नै बसेको पार्टी सचिवालय बैठकले भण्डारीलाई वरिष्ठ नेता बनाउने प्रस्ताव केन्द्रीय कमिटीमा लगेको थियो। त्यसपछि बसेको केन्द्रीय कमिटी बैठकले उक्त प्रस्ताव अनुमोदन गरेको हो।
भण्डारीलाई एमाले अध्यक्ष केपी शर्मा ओलीपछिको दोस्रो वरीयतामा राखिएको विभिन्न स्रोतले जनाएका छन्। यससँगै राष्ट्रपति पदबाट अवकाश पाएपछि एमालेको सक्रिय राजनीतिमा फर्कने उनको प्रक्रिया औपचारिक रूपमा अघि बढेको छ।
भण्डारी एमालेकी पूर्वउपाध्यक्षसमेत हुन्। उनी २०७२ सालमा पहिलोपटक र २०७४ सालमा दोस्रोपटक राष्ट्रपतिमा निर्वाचित भएकी थिइन्। राष्ट्रपति पदमा रहँदा उनी पार्टीको सक्रिय जिम्मेवारीबाट अलग रहेकी थिइन्।
राष्ट्रपति पदबाट बाहिरिएपछि भण्डारीले पुनः एमालेको राजनीतिमा सक्रिय हुने इच्छा व्यक्त गर्दै पार्टी सदस्यता नवीकरण गरेकी थिइन्। तर उनको सदस्यता नवीकरण केही समय रोकिएको थियो। एमालेले पछि सदस्यता नवीकरणको बाटो खोलेपछि उनको पार्टी राजनीतिमा पुनरागमनको प्रक्रिया अघि बढेको हो।
एमालेको जारी केन्द्रीय कमिटी बैठकमा पार्टीको संगठनात्मक संरचना, नेतृत्व तथा विभिन्न कमिटी गठनलगायत विषयमा छलफल भइरहेको थियो। यही क्रममा भण्डारीलाई वरिष्ठ नेता बनाउने प्रस्तावसमेत अघि बढाइएको हो।
भण्डारीलाई वरिष्ठ नेताको जिम्मेवारी दिने निर्णयसँगै एमालेको नेतृत्व संरचनामा उनको औपचारिक पुनरागमन भएको छ। पार्टीभित्र उनको आगामी भूमिका र सक्रियताबारे भने आगामी गतिविधिले थप स्पष्ट पार्नेछ।
