काठमाडौँ । नेपाली राष्ट्रिय क्रिकेट टोलीले आज मुम्बई–११ सँग दोस्रो अभ्यास खेल खेल्दैछ। दुई टोलीबीचको खेल मुम्बईस्थित ब्रेबोर्न क्रिकेट स्टेडियममा हुँदैछ।
यसअघि बिहीबार सम्पन्न पहिलो अभ्यास खेलमा नेपालले मुम्बई–११ लाई ७ विकेटले पराजित गरेको थियो।
अभ्यास खेलपछि नेपालले आईसीसी विश्वकपको तयारीअन्तर्गत युएई र क्यानडासँग वार्मअप खेल खेल्ने तालिका छ। नेपालले युएईविरुद्ध फेब्रुअरी ३ मा चेन्नईस्थित एमए चिदम्बरम स्टेडियममा खेल्नेछ। उक्त खेल साँझ सवा ५ बजेदेखि सुरु हुनेछ। त्यस्तै, क्यानडाविरुद्धको खेल फेब्रुअरी ५ मा चेन्नईमै दिउँसो सवा १ बजेदेखि सुरु हुने तालिका छ।
रोहित पौडेलको कप्तानीमा १५ सदस्यीय नेपाली टोली तेस्रो पटक आईसीसी विश्वकपमा सहभागी हुँदैछ। विश्वकप खेल्ने नेपाली टोलीमा रोहित पौडेल (कप्तान), दीपेन्द्र सिंह ऐरी (उपकप्तान), सन्दीप लामिछाने, कुशल भुर्तेल, आसिफ शेख, सन्दीप जोरा, गुल्सन झा, सोमपाल कामी, नन्दन यादव, ललित राजवंशी, लोकेश बम, आरिफ शेख, करण केसी, शेर मल्ल र बसिर अहमद रहेका छन्।
आईसीसी विश्वकप आगामी फेब्रुअरी ७ देखि मार्च ८ सम्म भारत र श्रीलंकामा आयोजना हुँदैछ। नेपाल समूह चरणमा स्कटल्याण्ड, इङल्यान्ड, इटाली र वेस्ट इन्डिजसँग प्रतिस्पर्धा गर्नेछ।
नेपालले पहिलो खेल फेब्रुअरी ८ मा इङल्यान्डसँग, फेब्रुअरी १२ मा इटालीसँग, फेब्रुअरी १५ मा वेस्ट इन्डिजसँग र फेब्रुअरी १७ मा स्कटल्याण्डसँग खेल्नेछ। नेपालका सबै खेल मुम्बईस्थित वाङ्खेडे स्टेडियममा हुने तालिका छ।
