काठमाडौँ। पाँच हजार अमेरिकी डलर पुरस्कार राशिको पब्जी मोबाइल नेपाल सिरिज २०२५ को ग्रान्ड फिनाले आज, २४ सेप्टेम्बर २०८२, अन्तिम दिनको प्रतिस्पर्धासँगै सम्पन्न भएको छ। यस प्रतियोगितामा देशभरका ११,००० भन्दा बढी खेलाडीहरूले सहभागिता जनाएका थिए। १० भदौदेखि सुरु भएको ओपन क्वालिफायर चरण पार गर्दै शीर्ष १६ टोली ग्रान्ड फिनालेमा पुगेका थिए। यी टोलीहरूले राष्ट्रिय उपाधिका लागि मात्र नभई डिसेम्बर २०२५ मा हुने ‘पब्जी मोबाइल स्टार च्यालेन्ज’ मा सहभागिता जनाउने अवसरका लागि पनि प्रतिस्पर्धा गरे।
ग्रान्ड फिनालेका खेलहरू पब्जी मोबाइल ई-स्पोर्ट्स साउथ एसियाको आधिकारिक युट्युब च्यानलबाट प्रत्यक्ष प्रसारण गरिएको थियो, जसले दर्शकहरूलाई प्रत्यक्ष रूपमा खेलहरूको रोमाञ्चकता अनुभव गर्न अवसर प्रदान गरेको छ।
यस वर्षको सिरिजमा पहिलो पटक फ्रेन्चाइज स्टाइलको फर्म्याट अपनाइएको थियो, जसले प्रतियोगितालाई थप आकर्षक बनाएको छ। यस फर्म्याट अन्तर्गत शीर्ष १६ टोलीहरूले उपाधिका लागि प्रतिस्पर्धा गर्नुका साथै प्रख्यात गेमिङ क्रिएटर र कन्टेन्ट पर्सनालिटीहरूसँग सहकार्य गर्ने विशेष अवसर पनि पाएका छन्। यसले प्रतिस्पर्धात्मक अनुशासनलाई इन्फ्लुएन्सर-केन्द्रित सहभागितासँग जोडेको छ।
साथै, समावेशीताको प्रवर्धनका लागि एक महत्त्वपूर्ण कदम चालेको छ। फाइनलमा नेपालमै पहिलो पटक ‘गर्ल्स अन्ली शो-म्याच’ आयोजना गरिएको छ, जसमा १६ वटा महिला टोलीबीच प्रतिस्पर्धा भएको छ। सहभागी टोलीहरूले कूल २५ हजार रुपैयाँ नगद पुरस्कार पाएका छन्। यस कदमले ई-स्पोर्ट्स प्रतिभामा लैङ्गिक विभेद नहुने सन्देश दिँदै नेपालको गेमिङ समुदायमा अझ व्यापक सहभागितालाई प्रोत्साहन गर्ने उद्देश्य राखेको छ।
